【李八方online】鄧家彪嫌眾志賣貴口罩捱鬧 累何啟明造口罩被壓價

更新時間 (HKT): 2020.02.14 00:05

被政府DQ咗嘅香港眾志,日前辛辛苦苦班咗10萬個口罩返香港賣,結果0秒賣晒。工聯會前議員鄧家彪唔知係咪眼紅,喺fb「恭喜」眾志火速賣晒「中國製」口罩,仲要寸眾志賣得貴,結果呢下回力鏢就中番喺大鑼大鼓話將會日產10萬個口罩嘅工聯會何啟明身上。

鄧家彪一面「恭喜」眾志令市民「感受國家嘅溫暖」同時,仲要引述何啟明話口罩成本兩毫子個,點解眾志要賣98蚊,結果瘋狂被網民留言鬧爆,譬如「搵唔到(口罩)就收聲,毫無風度」。

何解何啟明會知口罩成本幾多?因為佢都喺fb預告將會日產10萬個口罩。何啟明出咗條片,講佢同陳婉嫻視察位於大埔、將會用嚟生產口罩嘅廠房,當中已經整好咗無塵工作間,仲話啲機器經已嚟緊,估計最快下星期開始投產。佢亦同八方講,今次多謝好多人,先至令成件事由度橋到落實,只係兩個星期嘅事,至於其他詳情就留番遲吓記者會先講。

咁何啟明都算係做番件啱嘅事,所以好多網民都留言表示謝意,不過都有唔少網民因應鄧家彪嘅言論,要求何啟明用番成本價兩毫子一個去賣啲口罩囉。

至於工聯會個口罩工廠,原來係受各方支持㗎。就連俾人打斷收成期嘅陳健波,都有份力撐工聯會日產10萬大計。由陳健波擔任行政總裁嘅立橋保險集團,亦都宣佈捐100萬畀工聯會職業發展服務處,建立本地口罩生產線。

早排綠芝園(Farm66)創辦人兼行政總裁譚嗣籇話,科學園徵用咗佢哋嘅大埔廠房做口罩生產線,預計生產線可以日產10萬個口罩。地點、預計生產數量,同何啟明透露嘅資訊相當脗合喎,莫非科學園徵用嘅廠房,原來私下留嚟畀工聯會攞威?

一格照片,一個故事,Follow蘋果Instagram!
BannerBanner