› 選擇地區
三藩市
紐約
洛杉磯
其他美國地區
香港 台灣 北美
 
2019年08月14日

【81歲未收火】練馬師們似驚晒馬會!簡炳墀:我退休後冇乜人敢出聲

簡炳墀(近)出名敢言
建立時間 (HKT): 0814 07:56

「我係簡炳墀,我可以話你知,贏大賽冇咩秘訣,只要揀到匹好馬返嚟就得。我自己喜歡揀北半球馬,質素好。揀馬時睇血統,睇埋父母系生過嘅馬有冇成就。」

「至於照顧好一匹馬係非常有學問,首先一定要勤力,人哋返朝早五點,我就返四點。我會睇晒啲馬有冇唔妥,又要摸馬匹啲腳,如發熱就有問題,因為馬匹是涼性動物,馬腳不會無端端發燒。」

「又要睇吓佢哋食料情況,最緊要係細心。操練方面,我自己啲馬好少試閘,其實跑一、兩場就知佢哋嘅性能,只要有正常操練就得。」

「我點解會入馬圈?因為我很喜歡錢,年輕時睇過最快可搵大錢嘅方法,就係跑馬!加上本身亦喜歡馬匹,所以60年代我在英國半工讀賽馬,又要喺餐館做兼職,之後返港,1969年馬會有招聘,自己就加入咗馬會。」

「1972年馬會更派我去澳洲深造,之後過幾年做埋練馬師。啲人仲叫我『鄉下仔』,不過我成日有馬贏,所以人哋仲會話『嘩,鄉下仔又贏馬啦!』不過我唔覺得自己牙擦,呢啲係食力(實力)!」

「我當年65歲退休,現時大摩可練馬到70歲,我覺得呢啲嘢冇話公唔公平,時代不斷變,咁現時制度轉變咗,有啲練馬師可練到70歲,我唔會覺得自己只可練馬到65歲就可惜,始終年代和制度唔同。」

「我係五屆冠軍練馬師,馬會已頒咗個終身成就獎來表揚我,我都感到好自豪,因為當年跑馬係洋人為主,我身為中國人,可以贏咁多場大賽,又做冠軍練馬師,叻就係人都知。」

「我未退休時,都有個練馬師協會,我做主席,都會為同行發聲。當時我贏咁多馬,都唔使驚馬會,自己有食力(實力),當然夠膽講嘢發表意見,不過我退休後,家陣好似冇咩人敢出聲囉!」

「我退休後,馬會亦有搵我做顧問,但我唔等錢使,所以唔做。不過我就曾做過廣州同武漢馬場嘅顧問,畀吓意見發展賽馬要點先得。」

「我自己唔會投注,因為我贏嘅獎金已唔少,加上投注唔一定贏硬,如果咁容易贏馬贏錢,根本唔使做練馬師啦,做一兩年贏夠就可唔做,根本冇可能!」

「不過如果我覺得匹馬真係好有機會贏,我會畀馬主知,等佢哋叫多啲人入場拉頭馬。」

「對於早前「光復上水」,我都有現身支持。近期都有啲電台想搵我講吓時事,但我就話唔好啦,不過嗰日光復上水,我自己就有去,係因為啲水貨客真係成日阻住條街,平時想行吓都唔得,所以反水貨客活動,我一定支持。」

現年81歲的簡炳墀,加入馬圈前,於60年代曾為香港輔警。在港從練年份1978至2003年,澳門從練年份2004至2012年。

簡炳墀五奪香港冠軍練馬師(由1986/87馬季至1989/90馬季四連霸,到00/01馬季第五次奪冠),在港累積贏馬844場。

簡炳墀曾五奪香港打吡,頭馬計為85年「金中金」、86年「你知幾時」、89年「威利高」、92年「生圖」、01年「實業先鋒」。其中,「生圖」成為首駒包辦打吡孖寶(預賽及打吡)的馬匹。

他於2000年4月26日起孖累積722Win,刷新練馬師在港贏馬最多紀錄,其後多年才被大摩打破。

記者:傲洋、關志彬

-----------------------------
【每周送10萬】
升級壹會員獨家尊享,立即參加10萬火急大抽獎 !
*推廣生意的競賽牌照號碼:52302-9

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載