【驚驚豬】美伊關係緊張 曼聯歇冬唔去中東集訓

更新時間 (HKT): 2020.01.15 20:30

唔少歐洲大球會喺歇冬期間,都鍾意去中東地區嘅卡塔爾多哈或者阿聯酋嘅杜拜集訓,貪嗰度夠晒暖,唔使留喺冰天雪地嘅歐洲。不過,近期美國同伊朗關係緊張,中東地區亦隨時會擦槍走火,所以本身諗住二月歇冬拉隊去中東集訓嘅曼聯,近期已經打消咗呢個念頭。

過去曼聯如果冬天有空檔嘅話,都會拉隊去杜拜集訓,適逢今年英超有首創嘅歇冬期,曼聯預計二月初會有多達16日休息時間,所以本身領隊蘇斯克查就打算先放球員幾日假,然後再去杜拜集訓。不過,家下美伊嘅緊張形勢,就嚇怕咗曼聯,蘇B最近受訪嘅時候就表明,足球以外有令佢更擔心嘅事,「球會一直有留意中東局勢,所以去當地集訓呢件事唔會發生,我哋將會留喺歐洲備戰。」

包羅萬有,「體」得舒服,即Like「蘋果體育」FB專頁!
BannerBanner