【live cam做到嘢】睇波kiss二奶影到即縮 厄國偷食男斷正

更新時間 (HKT): 2020.01.21 18:05

偷食偷得多,就預咗有一日會被揭穿。好似有位厄瓜多爾球迷,同二奶親密到球場,結果被直播影到兩人咀咀「斷正」,返去同正印講乜都冇用。

上周一場巴斯隆拿SC對DC迪爾芬嘅季前賽,Live Cam拍住看台上有對情侶原本攬住錫錫,但點知兩個人意識到有cam拍住後,唔單止即刻停止親密,男嘅仲即刻放手,而且兩人笑容亦收返埋。呢一幕後尾被當地網友大肆討論,好多人都認為兩人應該係偷情先會行徑咁鬼祟,而後尾亦證實完全估中,皆因「男主角」後尾竟同網民喺罵戰中認咗,仲鬧呢啲cam真係害死人。

不過,班網民駁話做得出偷食呢家嘢,又唔夠醒目嘅話,就預咗有今日,家陣佢正印仲應該多謝呢個cam,否則就一直被蒙在鼓裏,最後呢位偷情男都要死死氣地向正印道歉,只係求求大家唔好再騷擾佢生活。

包羅萬有,「體」得舒服,即Like「蘋果體育」FB專頁!
BannerBanner