【曼城Play Boy】叫人Stay Home自己開淫P 獲加食學生妹斷正

更新時間 (HKT): 2020.04.05 21:47

獲加連續兩次畀《太陽報》踢爆,今次呢單性愛派對就據悉係上周嘅事,最諷刺係佢後一日仲喺IG拍片同人講防疫幾咁重要,其實自己前一晚先開完淫P。其實呢單嘢就係同佢開完淫P嘅援交女爆出嚟,呢位叫Louise嘅21歲援交女,仲要係一位喺曼徹斯特城市大學讀犯罪心理學嘅學生妹,指當晚佢收到負責呢啲援交交易嘅中介公司電話,話個客想要一啲比較有學識同高貴少少嘅囡囡,後嚟就上咗對方安排嘅車,而車上仲有另一位24歲嘅巴西籍女仔,兩個人嚟到位於柴郡嘅一個豪華公寓,就有一位男士出嚟接佢哋,就係今次一齊開淫P嘅基爾獲加友人。

Louise話自己其實見到獲加時,都唔知佢係球員,係另一個女仔同佢講完先知,仲話叫佢望真啲佢條底褲上,刻住「Kai」呢個名,就係基爾獲加出嚟玩嘅代號。然後兩個人就向佢哋支付2,200鎊(約2.1萬港元)嘅現金,作為今次派對報酬,而且獲加仲開咗一盒金色嘅安全套,4個人喺間屋大戰到深宵兩點,兩位囡囡先至離開。

唔知獲加到底知唔知,Louise影咗佢相,所以向《太陽報》爆料嗰陣show埋呢啲相,真係唔到你唔認。Louise仲笑基爾獲加根本就係偽君子:「我睇到佢第二日喺社交網叫大家要安全居家隔離,即刻心諗呢啲就係偽君子,啱啱前一晚先做完高風險嘅嘢。」

呢單醜聞爆出後,獲加已經即刻發聲明向大家道歉,話自己冇做到榜樣,但據聞曼城同領隊哥迪奧拿都好嬲,唔排除會重罰呢位右閘。其實獲加真係風流史一堆,早前同幫佢生咗3個細路嘅女友分手後,畀第三者嘅真人騷模特兒Lauryn Goodman爆佢出軌,仲搞大咗佢個肚,睇嚟要搵英球壇最新嘅「玩家」,真係非佢莫屬。

包羅萬有,「體」得舒服,即Like「蘋果體育」FB專頁!
BannerBanner