› 選擇地區
三藩市
紐約
洛杉磯
其他美國地區
香港 台灣 北美
 
2002年03月08日

「罰球厲害 交波一流」
求驗客手記:李華度向碧咸偷師

真係唔講你唔知,原來巴西球王李華度嘅死球教練,竟然係英格蘭「萬人迷」碧咸!話說當有人問李華度佢主射罰球嘅秘訣時,佢竟然好大方咁話:「呢啲係我向英格蘭中場碧咸學習嘅成果,碧咸唔單止主射罰球厲害,佢啲交波亦都一流;我不時都會睇佢射罰球同埋交波嘅錄影帶,重係慢鏡逐格重播嗰隻,我特別會留意佢點攞個波,同埋點踢出個波。」
其實,喺李華度之前,佢嘅巴西國家隊隊友卡洛斯,亦講過自己射罰球係向碧咸偷師嘅,重大大聲聲咁話:「如果我射到碧咸咁樣嘅罰球就好囉!」咁睇嚟碧咸咪成為咗射罰球嘅一代宗師?

米路足協唔咬弦
今個禮拜係中國甲A聯賽開鑼,重頭戲係上海打吡戰,米路無理由唔去睇班愛將,但佢老人家就話自己身體重未好得晒,唔想咁頻撲,留番喺北京睇另一場聯賽好過。有消息話米路因為唔滿意中國足協嘅備戰工作編排,所以詐病唔做功課。我求大俠就希望雙方唔好意氣用事,話晒都係中國人第一次現身世界盃決賽周,輸贏唔緊要,但係因為人事問題搞到隊波,輸都輸得唔光采,到時就喊到無謂。

蘇拿保護球證抵讚
車路士前鋒蘇拿雖然喺禮拜三球隊贏富咸三比二嘅英超聯比賽冇入波,不過兩隊球迷,甚至球證鍾斯,都封咗佢做英雄。話說當車路士領先一比○時,鍾斯突然判罰「車仔」十二碼,搞到一個「車仔」球迷好㷫,衝入場找鍾斯晦氣,喺呢個時候蘇拿挺身而出,擋住嗰位球迷,叫佢乖乖返回座位,結果兩隊球迷拍爛手掌,鍾斯重話會喺報告點名稱讚蘇拿㖭!

積臣威廉士罪加一等
前NBA球星積臣威廉士唔知為乜攞咗一位五十五歲司機嘅命,被控二級誤殺罪單案,𠵱家重審緊,但又有傳媒爆料,話呢位前網隊球員喺命案發生後,曾經企圖將死者嘅指紋印喺兇器嘅手槍度,以為可以瞞天過海咁話,如果真係咁就即係製造假證據,肯定罪加一等,威廉士呢次認真大鑊啦!

傑特倒戈輸波兼被噓
網隊主將傑特禮拜三首次倒戈返番舊球會太陽嘅時候,要好好教訓呢支棄用自己嘅球會出番啖氣,證明當初佢哋嘅決定喺錯嘅,當佢抵達場館嗰陣傳媒夾道採訪,威水到隊友笑佢似足布殊總統出巡咁墟冚,點知傑特唔單止被噓足全場,最衰重輸埋波㖭,散場後肯定搞到佢冇晒癮又冇「飛士」!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載