› 選擇地區
三藩市
紐約
洛杉磯
其他美國地區
香港 台灣 北美
 
2002年05月28日

英軍擾敵閉門操練
求驗客手記:艾歷臣廢話𠱁傳媒

由於早前有個英國記者俾人捷足先登,攞咗張今次世界盃嘅採訪記者證,英格蘭國家隊就以安全為理由,取消咗禮拜一、二嘅傳媒採訪;但計我求大俠話,佢哋只係借勢擾敵,費事畀瑞典知咁多軍情。
家陣球迷最關心嘅問題,梗係碧咸打唔打到對瑞典場波啦;不過英格蘭「閉門造車」,咁即係話碧咸嘅傷勢進展成點,根本就冇人會知。另外,英格蘭領隊艾歷臣喺暫停採訪前,高調話希斯基會喺對瑞典場波打正選。之但係,係人都知希斯基係英格蘭必然正選;所以艾歷臣咁講,等於無講任何嘢。
英格蘭隊波家陣五癆七傷,中場幾乎冇晒人,相反瑞典就可以夫添,跑慣江湖嘅艾歷臣梗係要諗諗計啦;而最好嘅方法,就係唔好畀對手知咁多嘢。不過,所謂紙包唔住火,𠵱家啲傳媒咁神通廣大,艾歷臣真係避得一時,避唔得一世。

史奈達投打機玩物喪志
球員通常都係投訴酒店啲設施唔掂,但係德國中場史奈達竟然反傳統,話房間入面嘅電視遊戲機駁唔到線,搞到佢冇得玩。睇嚟史奈達似乎唔記得嚟日、韓係要爭世界盃,唔係嚟打機。所謂「玩物喪志」,史奈達應該學似意大利班球員咁,得閒就睇吓書,無謂浪費精神打機啦。

卡洛斯自大被窒
早排巴西球星卡洛斯食咗大蒜,話巴西四成功力已經可以搞掂土耳其,搞到土軍領隊火都嚟埋,反咬卡洛斯一啖;指踢皇馬嘅佢,喺兩年前嘅歐冠盃輸畀加拉塔沙雷之後喊晒口咁,重反問卡洛斯嗰場波究竟使出咗幾多功力?我求驗客今次就唔幫卡洛斯啦;事關佢口氣大成咁,唔尊重人,又冇乜品。

荷利「寸」得有理
噚日場波湖人全場捱打,最尾先憑荷利球三分起死回生。賽後成隊帝王都話荷利「符碌」,點知荷利寸到痹咁回應:「唔該佢哋賽前睇吓我嘅往績先講啦。」咁又係,上年總決賽對76人、今年季後賽對馬刺,荷利都試過last射入三分令湖人反敗為勝,絕對唔係得個講字,抵佢認叻啦!

10號仔碧比腳法掂
帝王雖然輸波,不過季後賽新仔碧比就非常搶鏡。有球波佢自己帶波連過兩個人,點知旁述一讚佢好波,佢就唔小心一腳踢咗個波去。最瘀係旁述即時話世盃臨近,見佢係10號仔就知佢好腳法。真係唔知讚佢定笑佢好囉?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載