蘋果日報 | APPLE DAILY
› 選擇地區
三藩市
紐約
洛杉磯
其他美國地區
2002年08月19日
馬上成為壹會員

辯稱文人多大話
夏日求驗客:自傳筆者苦撐堅尼

曼聯隊長堅尼本自傳真係瘋人瘋語,據英國報章《世界新聞》星期日嘅連載,堅尼除咗睇唔起英格蘭足總盃之外,亦都唔順前愛爾蘭領隊積查爾頓,話大積係個笑話。堅尼重話,不排除好似當年簡東拿咁,受唔住球迷嘅挑釁,飛踢佢哋,重會比簡東拿踢得大力啲㖭!
不過,我求大俠最關注嘅,就係替堅尼呢本自傳執筆嘅作者鄧菲突然出嚟講,話堅尼其實冇講過要蓄意踢傷前曼城球員夏蘭特,鄧菲重話係自己文人多大話,想增加本書嘅吸引性先寫落去。不過,我求大俠就質疑就算真係鄧菲加落去,咁堅尼都要自己過目本書先出得,你哋話係唔係?

南華高層唔咬弦
南華總監Peter梁喺球隊開操前,因為同新任足主黃鎮南做嘢方式唔同,決定辭職唔玩,喺球圈引起好大回響。講開黃鎮南,呢位執業律師喺南華開操嗰日同記者講,喺Peter梁唔做消息見報後,未有機會向佢了解清楚;不過,有二五報料,話許晉奎同黃律師兩大高層喺南華開操前,確實約過Peter梁見面,至於點解見過都話未見過,就真係要問當事人至知喇。

孫繼海老竇冇波睇扯晒火
我求大俠睇完孫繼海首次喺英超聯登場嘅表現真係唔覺得失禮,佢老鄉大連嘅親朋戚友賽前當然亦坐定定,諗住喺電視機前睇直播。不過,點知到正式開波前,大連電視台先至收到英國方面通知,轉播費要臨時「加碼」;結果電視台迫於無奈要播另一場,搞到繼海老竇孫宗亮冇得睇個仔比賽扯晒火!

拉雲拿利好心有波贏
唔知係咪好心有好報呢?打比郡前鋒拉雲拿利喺前日球隊作客甘士比嘅英甲聯賽中,喺比賽打到十九分鐘,比數重係○比○時,由於見到甘士比球員利雲史東頭部重創,佢立即波都唔踢,重叫球證列克腰斬比賽。雖然列克冇咁做,比賽喺延遲十一分鐘後重開,但打比郡就以二比一反勝。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載