› 選擇地區
三藩市
紐約
洛杉磯
其他美國地區
香港 台灣 北美
 
2002年11月29日

砌到尾破蛋擁躉喝采
球驗客手記:紐記輸波鸁精神

紐卡素前晚喺歐冠盃又再次主場輸波,比拿美攞紅牌出場成為輸波罪人唔使多講,但係全場見到紐記班球員同球迷都咁搏命,真係值得一讚!
論級數,紐卡素就肯定唔及國際米蘭班球員,之不過講到鬥志,英超聯球員始終係各個聯賽最好;話晒比拿美好早已經被趕出場,紐記班球員差不多全場都係十人應戰,所以去到比賽末段都冇放棄,盡量爭取入球,精神可嘉。
重有嘅就係紐記班主場球迷,睇住球隊落後三球情況都冇話向主隊柴台,而且當蘇蘭奴入番一球時,「公仔箱」影住主場球迷笑住拍掌,唔係每隊波擁躉可以做得到。雖然我求大俠覺得舒利亞向簡拿華路開踭都應該攞紅牌,但場波真係好有球味,捱眼瞓都抵!

雲格信邪改用沙賓搞掂
球迷或者會奇怪喺禮拜三羅馬對阿仙奴場波,點解唔見施文落場。而據外電講,施文因為鼠蹊有傷倦勤,所以佢哋領隊雲格就用沙賓把關。之但係,唔好話我求大俠陰謀論,唔知係咪雲格見施文呢輪咁黑,出親場佢哋都輸波,於是就索性用之前打兩場都冇失過一球嘅沙賓守龍門。講真呀,施文咁老,都係時候退位讓賢嘞!

雲達沙自掏腰包捧富咸
富咸喺足協盃次圈次回合主場對薩格勒布,只得七千幾人入場睇波;由於佢哋喺第三圈次回合主場對哈化係開星期四下晝五點(英國時間),所以龍門雲達沙擔心到時得嗰小貓三四隻入場,就諗住自己出錢請喺荷蘭啲朋友嚟充撐場面。雖說雲達沙可能係得幾廿個朋友嚟睇波,但佢對足球咁有熱誠同對球會咁支持,實在抵讚。

姚明冒起是非跟住多
人紅自然新聞多,好似姚明咁,就有傳媒指佢嘅火箭隊友法蘭西斯雖然經常同姚明講好話、維護姚明,但其實喺操練同比賽期間,就好少同呢位中國球員溝通,原因係姚明逐漸冒起,成為佢嘅威脅咁話。但照我求大俠所知,報料係中國記者,唔知佢哋係咪多心抑或過於緊張姚明被冷待,呢啲嘢都係聽住先啦!

WNBA有執笠危機
成立咗只得三年嘅WNBA邁亞密陽光噚日宣布,因缺財源下季要「關門大吉」。真係同人唔同命!NBA愈搞愈旺,啱啱話喺下季將球隊數目由二十九支增加至三十支,點知同出一脈嘅WNBA就愈搞愈沉,來季將要由十六隊收縮為十五隊。其實WNBA近年嘅入座率同贊助收益都唔理想,如果官方唔儘快諗計救市,好可能有愈來愈多球會要倒閉。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載