› 選擇地區
三藩市
紐約
洛杉磯
其他美國地區
香港 台灣 北美
 
2003年01月19日

假日求驗客:博富咸衰到盡轉運

所謂「貧賤夫妻百事哀」,估唔到球會冇錢一樣咁擇使,好似英超聯球會富咸咁,佢哋最近要賣球場之餘,又俾國際足協追數,要佢哋喺禮拜一之前,將法國國腳馬列最後一期轉會費嘅二百五十萬鎊(約三千一百二十五萬港元)畀里昂。另外,熱刺當黑前鋒列布夫亦都話驚富咸嘅領隊泰簡拿做唔長,唔多想過檔。試問喺咁多不利因素下,目前球員個個人心惶惶嘅富咸喺禮拜日對米杜士堡時又點會打得好呢?
不過,戰鬥員A就秉承我哋《蘋果波經》名家一向唔信邪嘅傳統,認為富咸可以喺主場擊敗米杜士堡。前一次華度喺足總盃唔信邪捧曼聯嘅對家樸茨茅夫就衰咗,上次蘋果波神再唔信邪,認為啱啱攞完十二月最佳領隊嘅史特根領軍嘅修咸頓可以和波,結果就得咗,睇吓今次戰鬥員A又點?

雲格最叻出口術
阿仙奴領隊雲格最叻做乜,之唔係出口術囉。佢上個禮拜將杜加里捧上天,話伯明翰借啱人,但結果伯明翰咪俾阿仙奴數四粒囉!雲格喺對韋斯咸之前又重施故技,話保耶係個好球員,可以幫韋斯咸成功護級。但係,最近勁弗嘅名家華度就冇有怕,重力撐韋斯咸下盤!

奧雲被屈「爛賭」
古莊臣早排話自己差啲俾賭錢累死,搞到英國傳媒挖番晒以前嘅嘢嚟講。話說奧雲喺三隻馬身上使咗近五十萬鎊(約六百二十五萬港紙),但只係喺比賽贏番三萬四千鎊,於是英國《太陽報》借題發揮

馬拉仙拿自斷後路
國米宣布將會響禮拜一簽巴迪斯圖達,消息一出,基爾禾個前鋒馬拉仙拿就即刻向羅馬送秋波。馬拉仙拿最近同會方有拗撬,但佢係隊中首席射手,本來周日對祖雲達斯仍有機會落場。𠵱家佢公開離隊宣言,擾亂軍心,睇怕場波唔使預佢。祖記未開波已先除眼中釘。

口不對心抵死
噚日巨無霸同我哋中國巨人姚明碰頭,亦都意味住呢場係金錢同感情嘅戰鬥。因為賽前大部份人雖然話感情上支持同胞姚明,但一睇盤路,湖人由三分讓到終盤嘅六分,好明顯啲人暗啞底都係撐湖人嘅。口不對心後果係點?咪係睇住火箭成功「辣」低湖人囉;之但係見到明哥咁醒,我哋呢啲湖人躉都覺得抵嘅。

比利時波冇人吼
「梳打埠」響前晚又開多瓣比利時甲組聯賽畀大家玩,戲碼係苗斯干對標準列治。可能因為比甲聯真係唔太普及,我求大俠嗰日就昅住啲賠率變化,發覺呢場就好似嚿石頭咁郁都唔郁,一直都係苗斯干讓平/半高水,睇嚟都冇乜幾多人幫襯。
逢周六、日見報

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載