› 選擇地區
三藩市
紐約
洛杉磯
其他美國地區
香港 台灣 北美
 
2004年04月02日

世盃4哥食「魚腩」反胃
球驗客手記:南韓躉獅子吼報國

周三連場國際賽,當中最有冷味,非世界盃亞洲區外圍賽,南韓作客馬爾代夫打和○比○莫屬!
呢場波南韓並未有因為對手實力較弱而遣副選或新人上陣,相反重有李榮杓及薛琦鉉等外流球星壓陣,不過都要被馬爾代夫呢支目前世界排名第一百四十二,重低過我哋香港隊嘅球隊迫和,難怪賽後南韓國內傳媒及球迷都怒吼國家隊表現不濟,矛頭更直指葡萄牙籍教練高爾奧,睇情形重有手尾跟。
咁又係嘅,中國隊喺上屆世界盃外圍賽都曾經大勝馬爾代夫十比一,貴為該屆賽事第四名嘅南韓,竟然連一球都入唔到,抵鬧!

早咗開波無人知直播葡意翻改包輸
前晚另一場國際友賽,葡萄牙主場對意大利,賽前有博彩公司及電視台列明直播及開賽時間,為本地時間周四凌晨四時三十分;賽前一日再改為四時十五分開賽;到賽日又再將開賽時間更正為三時四十五分開波!呢次混亂就搞到唔少人錯過落注,其實「收費台」都係受害人之一!

練英文大鬧碧咸阿軍球迷嘥氣
皇馬中場碧咸喺禮拜日作客阿爾巴塞特時,將會不斷聽到主隊球迷用英文鬧佢;事緣嗰度有間英文學校為咗宣傳,就派啲寫有英文鬧人語句嘅小冊子畀球迷,等佢哋可以喺禮拜日搵碧咸嚟練習。碧咸自從出名之後,經常俾啲敵對球迷鬧到狗血淋頭,我相信咁做對佢冇乜影響。

樂意友賽西班牙巴治奧埋齋夠完美
巴治奧日前首次開腔,話如果查柏東尼真係重召佢入國家隊踢月底對西班牙嗰一場友賽,佢就樂於再披國家隊戰衣。照咁睇,呢場「巴治奧國際告別賽」成事機會好高。十年前世界盃,巴治奧對西班牙單刀妙射令人記憶猶新,再對西班牙作為佢國際賽終結,不失為一件美事。

車仔班主親自道歉雲尼亞里出番口氣
車路士班主阿巴莫域治日前就搵英領隊艾歷臣過檔一事,同領隊雲尼亞里道歉;而雲尼亞里事後表現得好得戚,重話以後嘅嘢慢慢講,𠵱家最重要就係幫隊波踢好英超聯同歐冠盃。雲尼亞里一直傳會俾車仔炒魷,雖則阿巴莫域治道歉亦唔代表佢可留隊,但起碼攞番個彩。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載