› 選擇地區
三藩市
紐約
洛杉磯
其他美國地區
香港 台灣 北美
 
2004年06月01日

波鞋Guide:「佐敦牌」成敗還看安東尼

事先聲明,我係佐敦牌的fans,由八代的風褸到已收檔的Two3系列一路捧場到𠵱家,隨着MJ東來,一剔也在亞洲努力開拓「飛人系列」;到底飛人服飾的將來應該要點走?
其實飛人服飾在北美市場萎縮係事實,佐敦退休係一個好大而不可能彌補的「死因」;世上又有多少個好似我呢啲死硬派fans,只要有個飛人Logo就嗌鍾意?JordanTeam裏面又有幾多人夠號召力?下季佐敦牌將力捧安東尼系列係非常正確的做法,所以安東尼的成長絕對係佐敦牌未來的關鍵。

要爭贏「馬仔」牌唔易
佐敦嘅「Lifestyle」系列中,約四百元一條牛仔短褲和短袖恤衫唔係話貴,但係同一個價位嘅對手係PoloSports同TommyHilfiger等中高檔牌子。要一班廿零三十歲的年輕人棄「馬仔」投「飛人」,確實高難度;加上有eastbay、footlocker成日喺網上將「飛人」系列大減價,亦令行貨難以生存。與其自己打自己,不如出啲專為亞洲人剪裁嘅服裝,重可能殺出血路。
最重要係佐敦牌始終脫離唔到籃球框框,呢樣就不能不向三間、R記甚至李寧牌學習,佢哋都可以成功脫離純運動服而走向休閒服飾。
講開飛人,一剔台灣的九十二秒佐敦快閃鬧劇,最後以一剔台灣總經理道歉告一段落,證明現今社會係顧客主導,而且唔好睇小傳媒的威力;「錯就要認,打就要企定」,希望下次球星再嚟時會引以為鑑!
Hleung-波鞋網站www.hk-kicks.com
頭目,最愛佐敦同柏賓,最怕寫字。
Email:hleung@hk-kicks.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載