› 選擇地區
三藩市
紐約
洛杉磯
其他美國地區
香港 台灣 北美
 
2005年03月08日

德國黑哨之風繼續吹?
球驗客手記:哈化兩判詐胡撕爛衫

球證加高文喺哈化對凱沙羅頓呢場波吹成咁,唔知會唔會成為新一個俾德國足總調查嘅球證呢?GettyImages

德國球壇最近受「球證黑哨」事件籠罩,不過德國嘅球旁證嘅表現就似乎冇乜改善,好似星期日場柏林哈化主場對凱沙羅頓嘅德甲聯直播賽事,哈化其實打得唔差,但意外落後之後就竟然有兩個入球都被判越位在先作廢。不過,慢鏡頭重播就顯示佢哋根本冇越位,可惜無論係執法嘅球證同埋旁證,都冇明察秋毫;唔怪得知柏化球員尼安度夫激動到要即場撕爛自己件波衫,更被罰牌啦!
雖然哈化最後憑後備入替嘅麥龍追平,同凱沙羅頓打和一比一,不過喺主場痛失兩分,就對佢哋爭下屆歐冠盃參賽席位(即聯賽前三名)有好大影響;因為佢哋𠵱家以四十分排第五,落後第三位嘅雲達不來梅三分。難怪哈化嘅教練高斯喺賽後都語帶雙關咁話:「對於球隊可以喺今場波終於取得入球,我好高興,因為有咁嘅球證同旁證執法,我哋要入到波實在唔容易㗎!」

「九二年三大新人」齊出場
熱火老鬼鬥騷「哥利」
噚日熱火作客大勝騎士,奧尼爾呢位九二年選秀狀元,因犯規問題只係打咗二十幾分鐘,但兩位隊友九二年嘅榜眼莫寧同探花列拿,就趁呢個機會表現自己:列拿嘅七分同四個籃板算OK;前者打兩分鐘就貢獻一分、一個籃板同封阻,反而同樣打兩分鐘嘅大郅就捧蛋,要加油啦!

場上猛爆粗朗尼被點名
英校長會籲樹好榜樣
英國學生哥鍾意睇波就唔使講喇!但佢哋啲先生就好頭痛,原來啲學生睇到球星響場度猛講粗口,返到學校就有樣學樣。最近,有個中學校長會嘅組織就呼籲,各球星唔好樹立壞榜樣,重點名曼聯嘅朗尼同堅尼㖭。其實,球星都要盡社會責任㗎嘛,唔係識踢波就可以為所欲為㗎!

「紅」運當頭破入球荒
阿祖出絕招掃烏氣?
國米前鋒阿祖安奴周日終於打破近三個月嚟嘅入球荒,而喺踢嗰球十二碼之前冇耐,重俾對手撞到頭破血流,出場包紮好後先入番場;好彩佢當時冇頭暈,一腳射入。我求大俠替佢高興時,諗到佢唔通要撞「紅」掃烏氣?點都好,希望「阿祖」繼續「紅」運當頭,入多啲波喇!

不羈浪子今洗心革面
林柏特置豪宅敍天倫
英超球隊車路士嘅中場林柏特,雖然以前曾被報道參加集體性派對,不過,佢近年已洗心革面,𠵱家重成為車仔同埋英格蘭國家隊嘅主力;佢最近更斥資三百五十萬鎊(約五千二百四十萬港元)買咗喺球會附近一幢四層高嘅高尚住宅,打算同埋屋企人同住,認真孝順。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載