› 選擇地區
三藩市
紐約
洛杉磯
其他美國地區
香港 台灣 北美
 
2006年06月25日

入波少對手又唔叻
睇通睇透:英格蘭穩陣買「細」啱數

世界盃咁多支球隊,要數好睇唔好賭,英格蘭真係認咗第二,冇其他隊敢認第一,投注喺佢哋身上真係贏咗都唔夠買驚風散,今晚對住厄瓜多爾,上下盤真係唔識賭。
英格蘭3場分組賽,論盤路係2贏1輸,頭場對巴拉圭,讓半/一嘅英格蘭晨早入波,結果守足大半場僅贏1粒。第2場對千里達,讓到球半/兩球,要靠謝拉特補時入個靚波,上盤客先辛苦食半格。到第3場讓瑞典平/半,又可以2次領先下俾人追和,好多買上盤嘅英軍球迷,條氣仲頂住頂住。
今次英格蘭要讓厄瓜多爾一球,16強淘汰賽真係好盡。賽前仲傳出英格蘭改打4-5-1,前線只係擺朗尼仔一個,英格蘭球迷都知,英格蘭之前進攻打得咁迂迴,就係碧咸、謝拉特同林柏特中場塞車問題,𠵱家隨時擺多個卡域克,真係塞上加塞;仲要留意領隊艾歷臣好興贏1粒就死守,讓到一球,買上盤好似望走盤咁。
既然係咁,「細」就真係好選擇,厄瓜多爾分組賽入到5球只係假象,小弟真係唔信迪加度呢啲英超冇班落嘅前鋒,可以入到英格蘭波;英格蘭入球又興一球起兩球止,入球細就好穩陣。

葡荷對攻吼「大」

葡萄牙對荷蘭,就揀番個「大」,其實呢兩隊2年前先喺歐國盃碰頭,葡萄牙當時贏2:1晉級,今次仇人見面,份外眼紅。葡萄牙今屆打得幾有朝氣,難得中場入球能力平均,只係C朗拿度有啲浪射;荷蘭攻力亦一向唔使懷疑,洛賓同尹佩斯亦都好弗,希望兩隊合演一場鬥攻好戲,整個2.35倍入球大,信往績,不如補個總入球3啦。
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載