› 選擇地區
三藩市
紐約
洛杉磯
其他美國地區
香港 台灣 北美
 
2006年06月25日

失地利青黃不接
世盃判官:4亞洲隊提早返歸

南韓(白衫)上周五以0:2負於瑞士後,今屆世盃賽無一亞洲球隊能晉身16強。美聯社

上屆世盃南韓憑主場之利,歷史性打入4強,另一主辦國日本都可以晉級次圈,以為亞洲球隊已經開始起飛,點知今屆完全打回原形,4隊亞洲波全部首圈講拜拜,可謂拜青黃不接所累。

先講南韓,今屆仍然要靠上屆老臣子壓陣,仲未有新人接到棒,再加上新教練艾禾卡特鍾意亂點鴛鴦,前晚對瑞士無端端換走李榮杓,令南韓右路攻勢癱瘓,想唔輸都幾難。日本今屆亦貨不對辦,條所謂嘅黃金中場線踢咗3場都無甚佳作,似有啲過氣和到克羅地亞都只係靠人哋射失12碼。至於沙地阿拉伯同伊朗仍然保持「魚腩本色」,分別做咗D組同H組嘅包尾大幡,其實到今時今日,兩隊都仲係要靠艾查巴同戴伊等老將撐場,又點夠人哋啲後生仔踢。
世界盃有6個分區,歐洲、南美之外,中北美洲有墨西哥入到16強,非洲就有加納,大洋洲區嘅澳洲(下屆轉玩亞洲區)都出到線,唯獨亞洲全軍盡墨,都算冇面。其實上屆南韓之所以入到4強,都不過係得到球證「庇佑」啫,要殺出亞洲,我判官認為都仲未夠班,講得難聽啲,佢哋不過係地頭蟲。

判官話

亞洲隊喺世界盃嘅表現一直唔算突出,甚至可用差嚟形容,所以4隊全部俾人叮走,一啲都唔出奇!
羞家指數:★★★★★
以5★為最高

網民反應:薛高冇料到

球迷對亞洲隊全軍盡墨又有乜反應呢?「南韓上屆淨係踢個軒迪克,今屆冇咗佢,即刻打回原形!」「一早都諗到佢哋冇咁勁㗎啦!」「一句講晒,薛高冇料到。」

名家話:出局好正常

對亞洲波好有研究嘅戰鬥員A又點睇呢?「主場係關鍵所在,日本同南韓嚟到人哋嘅地方,冇咗幾萬球迷喺背後打氣,難以好似上屆咁打高幾班波,出局都好正常。」

專家之說:球員應外流

「亞洲隊中以南韓表現最佳,頭2場奪4分,最後一場形勢使然要『焗』攻;日本防守較去屆差。伊朗仍可與歐洲球隊一拼。亞洲隊要更上層樓,讓球員外流歐洲是最佳方法。」
曾偉忠(港足隊教練)
歡迎球迷來稿:世盃判官係1個世界盃期間專為廣大球迷而設嘅欄目,球迷如對賽事有任何投訴、意見,想同我哋分享,就快啲投稿啦!來稿勿過300字。
世盃判官體育版電郵:worldcupjudge@appledaily.com
體育版傳真熱線:23703534

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載