蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年10月20日
馬上成為壹會員

入選中超明星賽
求驗客手記:吳偉超為港爭光

超仔8月份曾隨申花訪港同傑志踢表演賽,仲當選比賽嘅最佳球員㖭。資料圖片

我求大俠日前收到風,效力中超上海申花嘅港腳吳偉超,入選中超南北明星賽,總算為港爭光喇!
據講超仔係因為部份入選球員唔出席,先獲補選參加本月29日舉行嘅明星賽,不過能夠參與已經好唔容易。今次明星隊係由教練們投票選出,但票數唔公開,原則係每隊至少有1人入選。
內地新浪網就用「表現最穩定」來形容超仔,而且上海申花後防今季中超失球第二少(18球),超仔同國腳李瑋峰更被譽為最豪華防線,可見呢位港腳喺國內已經有番咁上下地位,今次入選亦係眾望所歸。
超仔接受訪問時講到:「好開心可以係6位入選明星賽嘅申花隊員之一,不過目前最重要係幫申花攞聯賽亞軍,下屆就可以繼續參加亞冠盃賽事,意義好大。至於下季目標,雖然現時都有其他球會搵我,但我踢完今季先至諗轉會嘅問題。」

力爭聯賽亞軍

講番超仔今季表現,上陣15場只係領得兩面黃牌,中超踢法硬朗體力化,作為防守球員打得咁亁淨好難得㗎。申花周日中超「煞科戰」擊敗遼寧隊,就可以成為聯賽亞軍,超仔加油啊!
「本地球員成日埋怨球迷唔支持,其實只要努力,球迷自然會支持;超仔就係好例子,幾年來喺國內默默耕耘終見出頭天,其他本地球員真係應該向佢學習喇!」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載