› 選擇地區
三藩市
紐約
洛杉磯
其他美國地區
香港 台灣 北美
 
2006年10月30日

Baller'sblog:我係NBA最佳控衞!

今日主角
姓名:馬貝利
球隊:紐約人
位置:控球後衞
年齡:29歲
年資:10年
特徵:極度自我中心的球員,自詡為聯盟第一控衞而引來各方訕笑

最近經常有人問我,一個身價成1,700萬美元(約1.3億港元)年薪嘅球星,着住對只值15蚊嘅cheap波鞋比賽,係唔係好唔襯?我都費事嘥口水回答;但係前幾日我練波時扭傷腳,嗰啲出晒名尖酸刻薄嘅紐約記者即刻喺我面前講風涼話:「It'sgottabetheshoes,right?」真他媽的,hellno!
我重申,我推出呢對15蚊嘅波鞋Starbury,唔係為咗賺錢,而係為咗買唔起成200蚊一對波鞋嘅青年人着想。對佢哋嚟講,200蚊已經係成家人一個星期嘅食用開支。我係喺俾人謔稱為「窮人海灘」嘅紐約科尼島(ConeyIsland)長大,細個時發夢都想着住AirJordan打波;但係喺個段艱苦日子,莫講話買波鞋嘅錢,就連一日三餐都掹掹緊。所以呢對鞋,算係我回饋弱勢社群嘅一點心意。

推出平價波鞋回饋社會

經一事,長一智!經歷上季嘅風風雨雨:球隊成績一落千丈、同教練布朗反目互罵……,我深深體會到,無論自己每場攞幾多分、幾多個助攻都係枉然,勝利先至係最重要。取勝就要靠全隊合作。呢個道理簡單不過,但好不幸,我要打咗足足10年NBA後先至明白。
回想起來,都係自己太早成名之過。讀初中時已有報紙雜誌訪問我,升上高中後更加被封為紐約史上最佳後衞;各間波鞋公司爭住要簽我,各間大學教練都求我入讀,甚至連NBA球隊經理同球星都經常致電慰問我。隊友、教練、經理人更加當我係救世主,從來冇人夠膽批評我半句。
不過最重要係我來自紐約啊!要喺紐約街場打響名堂,最重要係自信!無論面對任何對手、任何環境,你對自己嘅能力都深信不疑。有自信不代表你百戰百勝,但冇自信肯定百戰必殆!所以我絕對相信我係「NBA最佳控衞」!

冇自信百戰必殆

可能就係呢種性格,比賽時往往過於自我,信憑一己之力扭轉亁坤,以一敵五也在所不惜。但係……下年2月我就30歲了,人到「中年」萬事憂,加上NBA10年風雨,我終於明白,無論你如何獨當一面,你始終都係球隊嘅一分子。
文:深籃
電郵:trashtalk@appledaily.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載