› 選擇地區
三藩市
紐約
洛杉磯
其他美國地區
香港 台灣 北美
 
2006年11月16日

谷底王翻身月 AC、紅軍反擊 - 藍鑽石

利物浦、AC米蘭擁躉近日最怕聽到個「3」字,事關一隊啱啱吞阿仙奴3蛋,另一隊聯賽3連敗,衰到貼。好彩雙「紅」由𠵱家到年底嘅賽序好易應付,谷底反彈,可能由今個禮拜六開始……。 文:藍鑽石、青蛙仔

季前邊個會諗到,開季兩個幾三個月,利物浦嘅英超奪標賠率已經去到150倍,AC米蘭亦唔好得去邊,意甲封王賠率係100倍,一樣被人睇死。利物浦輸畀「兵工廠」輸得甘,之前連贏5場佳績一筆勾銷;最慘係領隊賓尼廸斯繼續我行我素玩怪陣,搞到士氣無晒,懷斯早兩日仲兜口兜面鬧自己龍門連拿係懦夫,內訌一觸即發。

兩隊同鬧內訌

利物浦今個禮拜六作客米杜士堡,對手近期喺河畔球場戰績好,但始終係神經刀,照秤利物浦可以睇高一線。「體」高一線嘅高治係球隊首席射手(聯賽加盃賽共入8球),近4場無波入,係時候交貨。假如過到呢關,紅軍未來個幾月應該順風順水,因為直到下個月30號對熱刺前,無一隊係強隊。
AC米蘭有幾衰,已經唔需要再花筆墨,近日睇見教練安察洛堤捧住金貘獎(意大利傳媒定期頒畀倒楣人物,攞景贈興嗰隻)個樣,真係唔知好嬲定好笑。同紅軍一樣,AC米蘭近日發生球員內訌事件,哥古夫同邦利拿練波埋牙,令法國仔意興闌珊想離隊,士氣無得再低。

AC前鋒要生性

當然,AC米蘭最大問題唔係士氣,係唔識入波,吓吓要靠中場球員遠射;斷估布洛治射10次都入唔番上場對羅馬個靚波。4個前鋒,恩沙基老啦,奧利華拉大家一早放棄咗,波里路似後備多過正選,望就望最後生嘅基拿甸奴踢番上季呢場賽序嘅水準,能夠再次對安玻里時梅開二度。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載