› 選擇地區
三藩市
紐約
洛杉磯
其他美國地區
香港 台灣 北美
 
2007年08月28日

求驗客手記:雷霆傷兵LAGALAXY - 求驗客

我求大俠幾時都話,美職聯係一個毫無廉恥嘅聯賽,你哋睇吓佢哋嘅賽制,直頭同NBA冇分別!美職聯不設降班制,啲球隊就算輸晒都冇事,好似洛杉磯銀河啱啱又作客輸0:3畀科羅拉多急流,原因係咩呀?之唔係留力打周三對帕丘卡場北美超級盃決賽囉!

不設降班 銀河5連敗

講番銀河周日聯賽對急流場波,佢哋收起咗碧咸、當路雲同沙維亞等共8名正選球員,唔怪得賽前有外圍佬同求大俠講,叫我攞晒成副身家買急流呢個讓平/半嘅上盤,點知半場已經贏3:0即刻收錢。
洛杉磯銀河唔經唔覺聯賽已經連輸5場,鬼咩,我話美職聯似NBA一啲都冇錯,因為銀河近5場敗仗入面就有4場要作客,跟住又連續打番兩場主場咁,十足NBA賽制一樣。銀河家陣咁多傷兵,好多因為養緊傷都冇隨隊周圍飛,迫住用嚟用去都係嗰啲人腳,唔怪得作客成日連敗㗎喎!

眾主將留力爭超級盃

聽講銀河教練耶洛普聞到魷魚香,周三場北美超級盃決賽有咩差池,相信都係咁大。所以耶洛普落晒「柯打」,話之你碧咸、當路雲、沙維亞全部有微傷,統統都要落場搏埋先,就睇吓呢3位「雷霆傷兵」可唔可以打救到呢位教頭喇。所以話,銀河為咗攞走北美超級盃,真係可以連聯賽都唔爭㗎。
呢邊耶洛普帥位有危機,嗰邊即刻傳出前德國國家隊教頭奇連士文有機會成為銀河新教練。原因有可能係銀河高層覺得,以耶洛普之流根本駕馭唔到碧咸呢啲大牌球星,處理唔到壓力大嘅問題。奇連士文話晒有地位,佢做球員時代邊個唔識「金色轟炸機」吖,加上奇連士文𠵱家住喺洛杉磯,佢教銀河一啲都唔奇。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載