蘋果日報 | APPLE DAILY
› 選擇地區
三藩市
紐約
洛杉磯
其他美國地區
2008年05月12日
馬上成為壹會員

美職聯之旅:老翻C朗玩轉銀河

CarlosPalafox無論髮型、身材都有8成似C朗。

「C朗」加盟銀河!繼羅致碧咸後,洛杉磯銀河找來一位貌似基斯坦奴朗拿度的「老翻C朗」,場外大玩花式控球娛賓,技術不比正版C朗輸蝕。球場內,「萬人迷」絕技七旋斬失靈,銀河最終以1:2不敵紐約紅牛,今季第2次令主場球迷失望而回。
記者李勇明洛杉磯直擊

相關新聞:特稿MissGalaxy幫球會做義工

可容納27,000觀眾的家得寶球場(HomeDepotCenter),在美國時間上周六晚上座無虛設,因為碧咸領軍的洛杉磯銀河,在此處迎戰紐約紅牛。與其他聯賽不同,美職聯甚少有球迷隨隊作客,換言之場內幾乎清一色為身穿銀河戰衣的主場球迷。

樣貌髮型表情十足十

開賽前3小時,拖男帶女的銀河擁躉魚貫入場,大會特別安排多個攤位招待他們,其中一處表演花式控球的區域,小記發現一位無論樣貌及髮型都十足曼聯球星C朗的表演者,在觀眾面前表演坐着、躺着、或騰空控球技術,博得在場人士拍爛手掌。
小記在休息時間與這位翻版C朗交談,原來他是一位20歲來自墨西哥與巴西混血兒,名字叫CarlosPalafox。鑑於他的樣貌、髮型、身材、甚至乎表情都有8成與C朗相似,稱呼他為「老翻C朗」絕不為過。Carlos說:「我本身是一位業餘足球員,能夠在這裏表演,全因銀河出錢聘用我。我雖然有點像C朗,但自己做出的控球技巧,大部份是在網上參考朗拿甸奴的。」
回說賽事,與其他美式運動一樣,這場銀河對紅牛常規賽,賽前依舊有歌手獻唱國歌,隨後的小型煙花匯演。當主持人宣佈正選名單時,球迷聽到David(碧咸)已開始情緒高漲。小球迷揮動手上的球會頸巾,部份亦敲擊吹氣棒增強聲勢,其間更齊呼「Galaxy……Galaxy……」,主場氣氛極佳。

碧咸失準當路雲隱形

可惜,上場對皇家鹽湖城梅開二度的碧咸,今天竟然腳頭無靈,不單止傳中球落點欠準,連處理角球時,斬出的皮球在前柱已被解圍,至於射手當路雲更像隱形一樣,觸球次數少之又少。
當銀河前鋒阿倫哥頓77分鐘取得入球,抵銷了紅牛前鋒丹尼保文21分鐘的近射後,主場球迷重燃希望。不過,前阿士東維拉前鋒安祖一分鐘後閃電入球,就如一盆冷水淋熄主隊氣勢和球迷熱情,銀河最終1:2落敗。

花絮:百二蚊睇碧咸攞T恤

洛杉磯銀河主場波飛,由15至275美元不等,可謂豐儉由人。值得一讚就係,賽會每場比賽都訂製大量T恤,送俾每位入場觀眾,換句話講,用唔使百二蚊港幣入場,睇碧咸之餘又可以攞件銀河T恤(圖),仲抵過喺香港睇甲組波。

花絮:喺美國睇波飲啤酒好煩

人哋話美國係最自由嘅國家,但有啲情況例外。好似外國人最興睇波飲啤酒,美國就諸多限制。買酒最基本年齡要21歲以上,而21至30歲之間,就要出示證件,檢查有冇醉酒紀錄。至於30歲以上同樣要出示ID,因為要做紀錄,每場唔可以飲多過兩杯,你話煩唔煩。

花絮:碧咸拖靚女銀河大細超

球員拖小朋友行出球場已成習慣,美職聯都唔例外。不過,當其他球員全部拖住肥妹或者肥仔出場嗰時,銀河隊長碧咸就拖住位樣子又甜、又可愛嘅靚女出場(圖),呢啲咪叫做大細超囉。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載