› 選擇地區
三藩市
紐約
洛杉磯
其他美國地區
香港 台灣 北美
 
2008年06月26日

求驗客手記:瑞典出局主將風流快活 - 求驗客

歐國盃打到4強階段,球迷見愛隊出局可能會傷心,分分鐘搞到失眠㖭!不過我求大俠就呼籲大家要睇開啲,因為球員本身都可能覺得出局係好事,起碼可以早啲放暑假,開心都嚟唔切啦!

韋希姆臣陪女友日光浴

我求大俠講嘅係瑞典國家隊,呢隊波好少喺大賽分組賽出局,所以可能連球員都估唔到今屆咁早收工,個暑假特別長。
記得翼鋒韋希姆臣首仗對希臘大腿拉傷,結果無緣餘下兩場分組賽,間接搞到球隊未能出線8強。不過自從隨軍失望回國後,佢就同女友奧莎娜去海灘享受日光浴,兩人仲不時親吻,早就將出局忘得一亁二淨。
瑞典頭號球星伊巴謙莫域(伊巴)又點呢?聽講有瑞典球評家呼籲畀佢做國家隊隊長喎!記得伊巴坐飛機返瑞典時,同記者講好心急要見個囡囡。點知《羅馬體育報》踢爆,呢位左膝有傷嘅中鋒同美爾保落夜總會玩,究竟佢係掛住邊啲女呢?

伊巴帶美爾保蒲夜總會

其實早係06年9月國際賽期間,伊巴就因同美爾保落夜總會搞到遲到,結果被教練拉格碧開除出隊。我求大俠唔係話唔准伊巴去玩,畢竟佢歐國盃帶傷上陣,又幾乎一個人孭起成隊波,兼有兩個入波,都好應該放鬆一下!
不過,伊巴作為瑞典足球新一代大佬,唔以身作則不特止,仲帶美爾保齊齊搞搞震,似乎唔係咁好喎。希望佢呢個月底同老婆、囡囡去美國度假,可以健健康康咁充下電,來季為新教練摩連奴領軍嘅國際米蘭出一分力啦!
當然,瑞典亦有好多好值得欽佩嘅球星,好似31歲嘅安達斯史雲遜0:2負俄羅斯賽後,一時諗唔開表示要退出國家隊。好彩佢返屋企戙高床板諗清楚後,周二決定繼續為國效力,全力爭取出戰2010世界盃。冇錯啦!球迷都要好似史雲遜咁,今次輸咗下次咪再嚟過囉!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載