› 選擇地區
三藩市
紐約
洛杉磯
其他美國地區
香港 台灣 北美
 
2008年10月01日

求驗客手記:日職聯大亂鬪! - 求驗客

講到日本波,浦和紅鑽上季挑戰日聯同亞冠盃雙料失敗,淨係攞得個亞冠盃,今季諗住嚟過,但嚟到呢一刻,居然有接近半打球隊有機會挑戰聯賽錦標,對紅鑽肯定唔係好事,不過球迷就有眼福啦!
紅鑽上季聯賽衰自己,季尾係咁失分,結果俾鹿島鹿角後上封王,做唔到雙冠王。今季佢哋喺亞冠盃打入4強(會同大阪飛腳爭入決賽),喺聯賽榜排第4,落後「1哥」名古屋鯨魚3分,好有機會夢想成真。之但係,今季聯賽爭持激烈,嚟到第27輪聯賽,頭5名得4分距離,除咗紅鑽同埋鯨魚,鹿角、川崎前鋒同埋今季爆出嚟嘅大分三神都有望奪冠。仲記得喺05年嗰季,亦出現類似情況,最後1輪6隊都有機會爭冠軍,最後由飛腳跑出。唔知今季係咪一樣咁戲劇性呢?
唔講你唔知,原來近兩季冠軍隊都由外國教練領軍;暫時做緊「1哥」嘅鯨魚,就係由前南斯拉夫名將史杜高域嚟執教鞭。史杜高域球員時代喺鯨魚踢咗8季,但佢之前冇教波經驗,如果真係幫鯨魚首登聯賽冠軍寶座,肯定威到爆!

史杜高域領鯨魚抗敵

喺日聯頭5名之中,除咗鯨魚之外,紅鑽、鹿角同三神都係由外國人執教,紅鑽嘅教頭係德國人安高斯,而鹿角同三神嘅主帥都係巴西人,分別係奧利華拉同查梅斯卡,得前鋒係由日本人高囗勉嚟教。所以話,今季聯賽亦係外勞教練同土炮教練之戰,如果高囗勉單拖都揪得贏4個外籍教頭,一定幫日本教練攞番唔少面子。
今日係十‧一國慶,晏晝有馬跑,黃昏有日職聯補賽,深夜就有歐聯,但我求大俠收到風,話現在台因為冇買到補賽嘅播映權,所以球迷今日有得賭冇得睇啦。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載