› 選擇地區
三藩市
紐約
洛杉磯
其他美國地區
香港 台灣 北美
 
2009年07月30日

求驗客手記:皇馬有前冇後C朗踢中堅? - 求驗客

鍾意玩FM(FootballManager)足球管理遊戲嘅波迷,應該試過特登將啲球員亂咁擺位,尋找新刺激,但斷估點錯配,都唔敢將基斯坦奴朗拿度(C朗)擺喺中堅位置啩?所以,當曼聯領隊費格遜預言C朗喺皇馬隨時踢中堅,顯然不懷好意,明寸人哋後防冇兵可用。

費Sir寸皇馬後防冇人

「有錢唔係大晒,睇新特蘭曾經試過花好多錢,俾人稱為英國銀行球隊,結果乜都贏唔到,仲要降埋班。」費Sir前日喺奧迪盃賽記招上想寸嘅,當然唔係新特蘭,而係皇家馬德里:「我唔係話皇馬會降班,但平衡方面好有問題,真係唔知比歷連奴點排陣。喺C朗走之前,我同佢講佢遲早踢中堅,因為皇馬呢個位置真係冇人用。」
查實皇馬呢個位置又不致冇人,比比、梅斯達同埋前曼聯兵軒斯等都係國腳級,當然畀人嘅信心又好似真係唔多夠。喺呢個記招上面,仲有拜仁慕尼黑教練雲高爾、AC米蘭教練李安納度同小保加教練巴斯利,前兩者聽完費Sir咁講,都加把口,結論係皇馬有錢唔係萬能!
皇馬最後嘅得失成敗,或者C朗會唔會真係衰到要踢中堅,怕且都要時間驗證,但唔知班皇馬兵係咪受到費Sir呢番言論嘅刺激,轉過頭皇馬就喺和平盃大炒利加大學4:2。

簽艾比路亞多個後衞

C朗喺呢場波起勢插花,下半場初段更射入親自博得嘅12碼,為皇馬打破悶局,亦射入個人效力皇馬嘅第1球;其後當格尼路為皇馬執雞領先到2:0後,雙方入球梅花間竹,最終皇馬大勝,不過後防失兩球,真係要加把勁。隊波周三終於落實以400萬鎊(約5,100萬港元)由利物浦買入西班牙右閘艾比路亞,叫做多個人用啦。
皇馬贏波後1勝1和,壓倒1勝1負嘅利加大學出線,明日喺4強賽會鬥祖雲達斯。你有C朗開齋,人家亦有迪亞高射入加盟祖記嘅第1球,助祖記3:0大勝城南一和。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載