› 選擇地區
三藩市
紐約
洛杉磯
其他美國地區
香港 台灣 北美
 
2009年08月14日

求驗客手記:開「咧」前轉52號波衫 賓特拿姿整王 - 求驗客

我求大俠遲早會向體育版主管建議,以後不如將賓特拿嘅譯名改為「賓特娜」。睇呢個阿仙奴前鋒,射波扭波唔見得醒,但就至鍾意扭花臣,姿姿整整,好似開「咧」前失驚無神先至話要轉球衣冧巴,由26改為52號,畀個女性化嘅譯名佢,應該冇乜人反對。

話自掏腰包賠球迷

「球季展開前,我想改球衣號碼,而揀52對我自己係有特別意義,希望可以為我帶嚟好運啦。」你就改得過癮,但早唔改遲唔改,難為嗰啲一早捧佢場買26號新波衫嘅球迷,好彩,佢都知衰願意補鑊:「見到球迷着住印有自己個名同埋冧巴嘅球衣,我會好興奮,對於嗰啲已經買咗(26號)波衫嘅球迷,我願意私人作出補償,不便之處,敬請原諒。」
既然佢肯私人科水,而個冧巴又阻唔到人,阿仙奴會方自然冇你咁好氣,冇話阻撓,只係一收到賠錢總數張單據,就會轉交賓特拿畀錢。據英國傳媒講,筆錢大概為數10,000鎊,以一個英超球員嚟講當然畀得起,但煩到人囉。

雲格唔加碼買查馬克

事先聲明,我求大俠並唔係顏色歧視,但呢位仁兄着過粉紅波砵落場比賽,係就係標奇立異,不過有少少騷味囉;上季佢又試過醉酒後當眾露底,雖則有指佢係被玩,但都相當羞家,家陣開「咧」前整色整水,若然我係領隊雲格,一定求神拜佛「賓特娜」搞埋呢次就專心踢波。講到尾,阿仙奴始終都係縮皮,賣完艾迪巴約之後,家吓斟波爾多射手查馬克有阻滯,計陣中正宗前鋒,只係得番佢同埋尹佩斯、伊度亞度達施華,想唔倚重佢都唔得。
講番查馬克單嘢,雲格已經開腔話唔肯加碼買查馬克,但我始終認為轉會未完全絕望,只係一種以退為進嘅手段,兩間球會不過鬥耐性,轉會窗仲有兩個幾禮拜至關門大吉,咩事都可以發生。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載