› 選擇地區
三藩市
紐約
洛杉磯
其他美國地區
香港 台灣 北美
 
2009年12月18日

求驗客手記:6項賽事全入波 柏度勁過中MarkSix - 求驗客

巴塞隆拿前日喺世冠盃反勝阿蘭特3:1,勇闖決賽,戰果唔震撼,震撼嘅係巴塞新星柏度洛迪古斯埋齋,成為史上首位一年內,喺6個官方比賽(西甲、歐聯、世冠盃、西盃、西超盃、歐超盃)都有波入嘅球員,純粹計呢樣,連前輩美斯、伊巴謙莫域同埋沙維都冇佢咁威,難度亦都同中六合彩有得揮。

史上第1人哥帥大讚

呢個22歲小子,前日喺67分鐘禁區內接應恩尼斯達妙傳後為巴塞埋齋,完成呢個能人所不能嘅壯舉,賽後自己就眉飛色舞咁話:「我感到榮幸,之前冇諗過可以做到。我會將今場着嘅波衫送畀家人,老實講,我比賽時只係以平常心面對,靜候機會。」
後生仔名垂千古,首先應該多謝嘅自然係畀機會佢嘅教練哥迪奧拿。後者對柏度洛迪古斯讚不絕口:「佢當然係一個潛質優厚嘅好球員,而呢個紀錄係屬於全隊球員,但都要佢把握到至得。」我求大俠當然唔偏心淨係講呢個新星,呢場波巴塞贏得,講到尾都仲係靠美斯。來自墨西哥嘅阿蘭特開波5分鐘,就由古勒莫洛查士閃電入波,意外咁領先,而巴塞30分鐘後由布斯基斯近射得手扳平。

巴塞決賽鬥學生隊

好喇,輪到美斯發威,由於佢嘅足踝傷啱啱好番,所以呢場波到52分鐘至落場,結果落場1分鐘後就即入波,接應伊巴謙莫域嘅傳送後,推過埋對方門將射入。隊友伊巴讚佢呢個入波重要(即係讚埋自己啫),而有西班牙報章更加用「偉大」嚟形容佢。巴塞贏波後將於周六同學生隊爭冠軍,到時就睇美斯同阿根廷同胞華朗點大鬥法啦。
巴塞唯一失意人要算係恩尼斯達,巴塞因為佢喺比賽中拉傷腿肌,決賽都唔使預佢喇。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載