› 選擇地區
三藩市
紐約
洛杉磯
其他美國地區
香港 台灣 北美
 
2010年05月20日

求驗客手記:「阿嫂」突爆冇上過床
泰利食死貓? - 求驗客

中國歷代美女,往往都成為「亡國」罪人,好似西施就搞到吳王夫差驕縱享樂,最後俾越王勾踐滅國;陳圓圓就搞到吳三桂引清兵入關。布歷治前女友佩龍塞爾,係唔係美女就見仁見智,但佢近日又再搞風搞雨,聲稱同泰利從來冇發生過性關係,英格蘭力爭第2次世界盃冠軍,又起暗湧。

一周兩晚入屋傾偈

其實泰利「勾義嫂」事件喺今年1月發生,當時英國小報就爆泰利「偷嗒」前隊友布歷治女友佩龍塞爾,仲搞大女方個肚,事後又畀錢佢去落仔。當時震撼成個英國球壇,泰利更因呢單醜聞而被褫奪英格蘭國家隊隊長職務。家跟隨英格蘭大軍去咗奧地利集訓,布歷治又冇入選大軍名單,單嘢其實已經淡化晒。
不過佩龍塞爾可能做新聞女王做上癮,周二就同英國報章自爆,從未同泰利發生過性關係,只係一星期有兩晚,泰利會去佢屋企傾偈。如果佩龍塞爾冇講大話,咁呢單嘢就更加撲朔迷離;孤男寡女獨處一室,但係女方冇損失,我求大俠夠膽講,可能性只有兩個,一係女方醜得滯,搞到男方冇晒興趣,單睇佩龍塞爾嘅相片,佢又未至於醜成咁。
另一個可能性,係泰利「唔得」。男人咁講面子,如果呢家嘢唔掂,就真係好冇面。加上泰利喺醜聞發生後,一直都冇否認,「勾義嫂」咁大隻死貓都食得落,唔通真係有更大嘅醜事唔想俾人知?無論如何,都希望喺奧地利嘅英軍,睇唔到英國報紙,唔好又俾呢單嘢影響軍心。

巴利未掂卡帥防中搵京治

講開英格蘭,中場巴利有傷未必及時康復,領隊卡比路就想冒險,推熱刺嘅京治打防中;無錯29歲嘅京治初出道都打過呢個位,不過近年都係專心打中堅,既然英軍陣中都有謝拉特、卡域克、柏加可以打防中,我求大俠就唔多睇好卡比路呢個選擇嘞!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載