› 選擇地區
三藩市
紐約
洛杉磯
其他美國地區
香港 台灣 北美
 
2010年06月17日

世界動物園:C朗、卡卡大佬唔易做

C朗(左)與沙保沙(右)同樣好波,卻未能同心協力助葡萄牙爭取成績。資料圖片

西甲皇馬上年雷聲大大,搵嚟巴西10號仔卡卡同全球最高身價嘅葡萄牙翼鋒基斯坦奴朗拿度(C朗),諗住球隊成績一定好之際,卻嚟個四大皆空。而呢兩位仁兄,返到國家隊做「大佬」,唔知係咪沾到球會啲黑氣,周二齊齊喺世盃G組登場,表現麻麻,卡卡仲被插唔配着巴西10號,真係大佬唔易做!

卡卡冇資格着巴西10號

5屆世盃盟主、世界排名第1嘅巴西,禮拜二首戰北韓,雖然最終贏2:1,但身穿森巴足球王國舉足輕重的10號球衣新主人卡卡,表現乏善足陳,更曾在無壓力下將皮球傳出界,真係令人失望。如果唔係右閘馬爾干一記金球,森巴舞步可謂蕩然無存,更有網民炮轟卡卡冇資格着10號!
事實上,過往幾代森巴10號仔都光芒四射,好似98、02年嘅李華度、去屆嘅「細哨」朗拿甸奴都係一代球王;相比星味漸淡的卡卡,恐怕只有94年嘅萊爾有得同佢「揮」。
季中受鼠蹊同小腿傷患困擾嘅卡卡,復出後一直未能回復十足狀態,即使喺皇馬有C朗等隊友在陣,都未能帶領銀河艦隊染指錦標;不過,豁達嘅卡卡前日賽後話︰「我覺得自己打得唔錯,我嘅表現會一場比一場好。」

C朗累沙保沙變後備

至於佢球會隊友、即將喺世盃變敵人嘅C朗,喺對科特迪瓦時除咗遠射中柱較為似樣外,表現同樣備受批評。相比卡卡,葡萄牙更加屬於C朗嘅一人球隊,曾經喺曼聯合作嘅教練基羅斯亦喜用C朗,間接令大賽經驗更多嘅沙保沙淪為後備。
實而不華嘅沙保沙,本身對C朗鋒芒畢露嘅作風睇唔過眼,據稱佢兩個喺對科特迪瓦賽前曾經口角;一人球隊加上隊員內訌,唔怪得今屆世盃首戰只能摸和「大象」。如果仲解決唔到呢啲心病,葡萄牙下場分分鐘輸埋畀北韓都似。

當年今日:17/06/02

巴西由李華度及朗拿度建功,在這場16強賽贏比利時2:0,比利時主將韋莫斯的頭槌入球被誤判作廢,成比賽關鍵。

有數講:39

今屆世界盃最年老的球員,為1970年8月1日出生的39歲英格蘭門將占士;第2位亦是門將,為1972年6月15日出生的美國門將夏尼曼。最年輕的球員則為1991年11月7日出生的新西蘭前鋒基斯活特。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載