› 選擇地區
三藩市
紐約
洛杉磯
其他美國地區
香港 台灣 北美
 
2010年06月18日

世盃動物園:鄭大世有個靚阿媽

近排有傳媒吹捧北韓人氣球星鄭大世嘅媽媽李貞琴好省鏡,我求大俠開頭都好質疑,心諗應該係同北韓啲女新聞報道員差唔多質素。不過,喺睇佢媽媽啲相之後,我求大俠可以證實唔係老吹,真係好掂,仲直頭拍得住喺深夜重播劇《天地豪情》裏面,飾演媚姨嘅甘草演員雪妮。
啲球星嚟南非打世界盃決賽周,身邊嘅女人唔係老婆就係女友,但靠兩行眼淚而令全世界都認識佢嘅鄭大世就好唔同;佢不只冇沉迷女色,而且仲好孝順,請咗媽媽嚟幫自己加油。家陣喺日本名古屋住嘅鄭媽媽,同埋20幾個都係喺日本定居嘅北韓親友,早喺6月13號就到咗南非,仲話喺3場世盃分組賽都會入場睇波,坐喺觀眾席上為囝囝打氣。

唔似6張嘢同o靚妹有得揮

禮拜二北韓喺「死亡G組」輸1:2俾巴西場波,鄭媽媽梗係有入場,而且扮得好靚,披住一條印有鄭大世個名嘅圍巾,望落去仲唔似有成59歲,仲一啲都唔輸蝕俾身邊嘅年輕女粉絲。計我求大俠話,鄭媽媽個樣真係幾掂,話係韓星都隨時有人信,如果韓劇《一屋叉燒的家庭》有球場版,電視台真係可以考慮搵佢嚟做女主角。
鄭媽媽賽後接受記者時話:「我同班親友係嚟睇波。除咗我,仲有安英學嘅媽媽鄭末禮,我哋兩個仲係以球員家屬身份入場㖭。其實喺國家攞到決賽周入場券後,我哋就開始計劃南非之旅,我倆都成60歲人,之後可能再冇咁嘅機會。」

傳獲車範根搭路投德甲

對於囝囝喺對巴西嘅表現,鄭媽媽就話:「我為佢感到驕傲。之後我哋仲有兩場分組賽,我會繼續幫佢加油,希望佢可以幫國家打入16強啦!」但鄭大世就喺媽媽面前,俾巴西中場卡卡請佢食檸檬,賽後唔肯同佢換波衫,好彩聽聞南韓名宿車範根幫佢搭路過德甲,算係補番數啦。
查實今次唔係鄭媽媽第1次出外做囝囝嘅應援團。之前喺世盃外圍賽嘅10強賽,佢就同現年69歲嘅鄭爸爸鄭吉夫一齊返咗北韓,喺金日成競技場睇對阿聯酋場波,最後北韓仲贏2:0㖭。

當年今日:18/06/2002

南韓加時後贏意大利2:1,在這場16強賽爆出近代世盃最大冷門之一。安貞煥(19號)頂贏彈弓人馬甸尼,傷透意軍球迷的心。

有數講:16

今屆南非世界盃的吉祥物「Zakumi」周三度過其16歲生日,選擇於6月16日「出世」為因該日為南非的青年節,而「Zakumi」為一隻活潑的豹,其綠、黃色代表着南非國家隊的主色。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載