› 選擇地區
三藩市
紐約
洛杉磯
其他美國地區
香港 台灣 北美
 
2010年07月02日

世盃動物園:英軍度假鬥交戲
朗尼黯然 林伯銷魂

朗尼抵達巴巴多斯全程面燶,完全唔似去嘆世界。互聯網

英格蘭「粉絲」仲為英格蘭喺今屆南非世界盃出局而傷心?睇開啲啦,你有你傷心,班球星鎩羽返國開完Party後,已經開始或者正計劃過一個比預期為長嘅暑假,實行各自各精采,好似朗尼一家人日前就已經飛抵巴巴多斯。通常球星度假,你話真心又好、做騷又好,通常都係笑騎騎,不過睇朗尼好幾張到埗相,全程黑臉,所謂何事?

朗尼全程黑面扮傷感?

一如日前各大傳媒報道,朗尼同老婆高蓮、個仔佳佳(Kai)同埋幾個親友,浩浩蕩蕩抵達巴巴多斯;明明係度假,仲要係朗尼第一次去到之前自己喺當地買落,價值500萬鎊(約5,830萬港元)嘅大宅嘆世界,照計心情靚到絕,但何故佢全程燶臉呢?唔通係睇身邊嘅老婆花枝招展,自己就全程照顧佳佳,擔擔抬抬一腳踢所以好無癮?又或者為自己今屆世界盃決賽周食白果耿耿於懷?
即管以小人之心睇呢件事,講到尾,朗尼踢得差之餘,又被踢爆喺對德國嘅16強賽前已book定機票度假,擺明冇信心,已經被國內傳媒抽晒水狂插;若然外遊時仲笑騎騎,容乜易又俾人話不知廉恥?佢保持呢個面口,真係應該俾人彈少句。

林柏特拖女晒恩愛

有別於朗尼,林柏特話晒喺決賽周表現好過朗尼,又係嗰個「世紀誤判」嘅主角,冇乜壓力,於是同女友碧姬莉、表兄弟列納等飛去意大利薩丁島享受陽光與海灘時,笑容滿面。梗係啦!今次係「林伯」第一次公開同碧姬莉出外嘆世界,伊人亦好識做,着件火辣嘅紅色3點式泳衣依偎「林伯」,呢鋪仲唔係朗尼黯然,「林伯」銷魂。
除咗佢兩個,已知今屆孭大黑鑊嘅羅拔格連飛去美國洛杉磯忘憂,至於以謝拉特老婆為首嘅成班WAGs,似乎真係冇諗過英軍咁快out,呢幾日仲好似平時咁行街shopping,好似未諗好去邊度玩。不過,有錢你慌冇得嘆世界咩?相信好快又會見到班闊太、索女好似碧姬莉咁,着晒火辣3點式示人啦!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載