› 選擇地區
三藩市
紐約
洛杉磯
其他美國地區
香港 台灣 北美
 
2010年08月31日

求驗客手記:涉傷人扣查10粒鐘
韋舒亞夜蒲闖禍 - 求驗客

年輕人到酒吧、夜店消遣本來係平常事,但好多時都因為飲多兩杯而酒後亂性,同其他人出現爭執,甚至打交都有,好似早前尖沙嘴諾士佛台夜店案,最後有人連命都賠上,結果真係冇人想見到。日前,阿仙奴嘅年輕新星韋舒亞,就涉及一單夜店外傷人案,雖然冇死人,但就俾警方扣查成10個鐘頭。

肇事女事主手踭骨折斷

事緣韋舒亞上周六踢完對布力般流浪嘅比賽後,就同友人夜蒲,凌晨時分喺西倫敦一間著名夜店外,與數名友人一齊期間,同一男一女發生爭執,仲打起上嚟,而韋舒亞同佢嘅友人事後雖然想坐的士離開,但就俾到場嘅警方截住,帶返警署助查。據報,肇事女事主手踭骨折斷,男事主就傷勢較輕,只係面部有傷痕。

發言人:韋舒亞做和事老

警方稱,相關人士都充滿酒氣,估計係雙方受到酒精影響而出現爭執,繼而動武。韋舒亞嘅發言人隨後亦證實,呢位18歲阿仙奴新星的確捲入一宗傷人案,但就表明韋舒亞只係喺事件中充當和事老,阻止其友人同男女事主打鬥,所以警方一直都冇對佢作出任何起訴。
韋舒亞發言人有冇維護呢位年輕小將,相信好快就知,因為閉路電視拍攝到雙方爭執過程,而警方亦會從中了解事件,以作出正確起訴。
上季外借到保頓嘅韋舒亞,今季獲阿仙奴收回,並且獲得領隊雲格嘅重視,季初已經有機會以後備身份喺英超賽事上陣,以佢嘅位置,隨時成為法比加斯嘅接班人。今次夜店打鬥事件,就算真係查出佢冇份打人,雲格都肯定激到㷫烚烚,皆因年輕球員最容易因為場外行為影響其足球員前途,而身邊嘅損友亦隨時累及自己,所以我求大俠喺度勸韋舒亞,就算唔係你打人,最好都係遠離呢啲搞事損友,俾人累到冇晒前途就唔抵啦!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載