› 選擇地區
三藩市
紐約
洛杉磯
其他美國地區
香港 台灣 北美
 
2010年09月07日

求驗客手記:退出球壇 拒絕訪華
巴圭教母放飛機 - 求驗客

巴拉圭「教母」今趟唔做手機妹,做飛機妹—放晒全中國球迷飛機。千呼萬喚,莉爾莎列基美(LarissaRiquelme)最終並冇隨巴拉圭國家隊訪華,理由係唔想再同足球扯上太密切關係。陰功,佢退出「球壇」,以後大家會唔會少咗好波睇o架……。

「唔想再同足球扯上關係」

前日巴拉圭抵達南京,準備今日同國足拍跳。唔係話隊波唔夠吸引力,例如帥哥辛達告魯斯一抵達就俾女球迷包圍,不過大家最期待,始終都係莉爾莎列基美到底會唔會隨隊;記得今次中、巴戰組委會負責人顧雷鋒曾經講過,佢肯嚟就會特別安排VIP包廂,結果由最初講到想嚟但冇嚟,今次巴軍訪華之旅難見阿妹芳蹤。
據消息指,其實國內唔少商業機構一早準備贊助,為莉爾莎列基美封番封大利是(傳聞係3萬蚊美金),即係話錢唔係問題。偏偏據莉爾莎列基美經理人講,佢「唔想再同足球扯上關係」,令訪華告吹。
聽到呢度,我求大俠都晒頭,「教母」明明因今屆世界盃成名,擺明係靠波上位,連同《花花公子》拍嗰輯相一樣有足球,因乜事唔食住條水?我大膽講,佢今次放大家飛機,損失嘅肯定唔止3萬蚊美金,而係無限商機。
冇美相伴嘅巴拉圭大軍,號召力弱咗,但據講球員恃住隊波係世界盃8強分子,玩大牌;除咗辛達告魯斯世界仔,仲識主動同人打招呼,其餘都木口木面。第一日到埗又只進行封閉式練習,又突然增加一張額外伙食清單,仲要將食物送上酒店房間,連落樓食嘢應酬都慳番。
講番國足,隊波輸俾伊朗之後,抵達南京先唔係操波,而係噚日有半日假去南京街閒逛;消息指係高層見班球員太緊張,想佢哋輕鬆吓減壓喎。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載