› 選擇地區
三藩市
紐約
洛杉磯
其他美國地區
香港 台灣 北美
 
2010年09月22日

求驗客手記:奪世盃 做老竇 爭世足
小白喜事過3關 - 求驗客

恭喜!恭喜!巴塞隆拿嘅西班牙國腳中場「小白」恩尼斯達,將會迎接人生新階段;因為佢剛公佈另一半安娜有咗約兩個月,佢將會首次做老竇!小白助巴塞同西班牙奪標無數,連喺今夏世盃決賽個致勝入球都係佢入,難怪成為年底世界足球先生嘅熱門之一。埋單計數,小白贏咗世盃、就嚟做老竇,如果年底成功過3關贏世界足球先生,就真係3喜臨門喇!

明春首次做老竇

猶記得小白喺09年5月嘅歐聯準決賽次回合對車路士時,為巴塞射入關鍵1球而助巴塞入決賽之後嘅9個月,巴塞隆拿市突然多咗好多bb出世,呢啲bb被稱為「恩尼斯達一代」;估唔到喺出年春天,26歲嘅恩尼斯達自己亦首次做老竇。
佢喺個人官網( http://www.andresiniesta.es )

度公佈呢個喜訊:「大家好!有報道話我就快做爸爸,我喺度亦可以證實呢個消息,我同我嘅伴侶安娜都好開心;不過呢啲係好私人嘅事,希望大家明白點解我哋唔想再公開講呢件事。」
據西班牙傳媒指,小白係趁世盃之後嘅小休,同安娜喺意大利薩丁島度假時造人成功;恩尼達斯射波準繩、例不虛發係人都知,估唔到連造人都係一擊即中。
其實除咗小白之外,有唔少球星都就嚟做老竇,好似小白嘅國家隊隊友費蘭度托利斯將會第2次做老竇,據講佢太太今次呢胎係仔,啱啱可以湊成個「好」字;而阿仙奴嘅丹麥前鋒賓特拿,亦搞大咗富婆女友個肚,可能因為咁,目前正在養傷嘅佢被指已「搵到好歸宿所以打算掛靴」,咁賓仔當然否認啦!

高治女友大肚升cup

另外,早前被踢爆偷雞嘅熱刺英格蘭前鋒高治,亦已同女友艾比和好如初,艾比仲有咗3個月身孕㖭!不過,艾比冇因為咁就停咗手頭上工作,仲剛剛喺倫敦時裝周行花生騷;唔知係咪大肚關係,艾比雖然未見肚,但上圍明顯升cup,將同場曾被選為擁有「最美麗雙峯」嘅KellyBrook比下去,真係勁!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載