› 選擇地區
三藩市
紐約
洛杉磯
其他美國地區
香港 台灣 北美
 
2010年10月06日

求驗客手記:哈化金毛仔尼美亞錯摸
索女球證笑食鹹豬手 - 求驗客

哈化柏林前晚喺德乙主場打和亞琛0:0,以7戰17分續做1哥,1分領先格雷特霍夫及奧厄。淨係睇賽果,場波應該冇乜特別,但查實有令球迷O嘴嘅場面,事關哈化中場尼美亞無端白事做咗灰太狼,喺比賽途中送咗隻德國鹹豬手畀金髮靚女球證施汀侯絲食,好彩施汀侯絲能夠冷靜處理,呢單疑似非禮事件先至收到科。

突遭拍胸部3秒

話說場波打到54分31秒嘅時候,電視鏡頭影到哈化中場尼美亞,突然向企喺佢右邊嘅31歲女球證施汀侯絲出鹹豬手,隻右手係咁拍落對方嘅左胸度,仲拍打咗成3秒咁耐。施汀侯絲察覺俾人胸襲後立即閃開,仲用左手摸摸自己個心口,然後怒睥尼美亞,再質問佢做乜胸襲佢。尼美亞喺呢個時候,似乎知道自己做錯事,於是猛咁同施汀侯絲解釋。施汀侯絲亦接受佢嘅解釋,向佢報以一個微笑,令呢單疑似非禮事件告一段落。
由雲達不來梅以借將身份為哈化效力嘅中場尼美亞,事後接受訪問時話:「當時我以為佢離我遠。我亦冇心拍佢個胸。」哈化教練巴布亦相信尼美亞係清白,佢話:「對於嗰啲下流嘅人嚟講,或者會覺得呢個場面喺整場波至正嘅。」
睇番德國報章cap出嚟嘅電視畫面,當時尼美亞個人向後行,對眼就向前望,似乎真係睇唔到施汀侯絲企得咁近佢;更何況,球員喺場上為咗爭位而向對手毛手毛腳係好平常嘅事,佢應該係當咗施汀侯絲係亞琛球員,先至出隻右手係咁拍。曾經喺德甲(07/08球季多蒙特主勝雲達不來梅3:0)做過第4球證嘅施汀侯絲,冇對事件作任何評論,不過佢就話滿意自己嘅表現。

蝕底唔怕微笑掛面

德國傳媒事後大讚施汀侯絲當時嘅表現,話佢雖然係蝕底咗,不過仲好冷靜,喺質問尼美亞嘅時候仲識得面帶微笑,而且頭尾用4秒時間就解決咗事件,證明佢有能力應付突發事件。我求大俠都起咗佢底,知佢由07/08球季開始喺德乙執法,亦吹過今夏嘅女子世青盃,經驗真係唔需要懷疑,所以第日分分鐘見到佢喺德甲做球證都未定。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載