› 選擇地區
三藩市
紐約
洛杉磯
其他美國地區
香港 台灣 北美
 
2010年10月13日

求驗客手記:成洗衣液代言人
韋拿變師奶殺手 - 求驗客

我求大俠睇過唔少洗衣粉電視廣告,仲對雯女同娥姐拍嗰兩個印象好深刻,西班牙國腳前鋒韋拿最近加入咗佢哋嘅行列,做咗洗衣液代言人。韋拿拍體育用品廣告就駕輕就熟,估唔到拍家庭用品廣告一樣掂,成個師奶殺手咁,唔知第日有冇機會cross-over,同雯女同埋娥姐齊齊拍洗衣粉廣告呢?
近排有唔少西甲球星拍廣告,好似皇馬嘅西班牙孖寶卡斯拿斯同埋沙比阿朗素咁,就分別做咗剃鬚同埋潤膚用品嘅代言人。至於巴塞班球員亦唔輸蝕,陣中嘅阿根廷新晉球王美斯就俾一個意大利高級時裝品牌睇中而搵佢代言,佢嗰輯廣告硬照亦喺日前出街。而美斯同卡斯拿斯以及沙比阿朗素sell嘅都係男人嘢,雖然好表現到運動員同埋成熟男士嘅一面,但層面始終比較窄,而巴塞嘅西班牙前鋒韋拿就好唔同,佢sell嘅洗衣液,真係乜人都啱。

收埋球技改玩親民

韋拿早前喺個體育用品廣告內大展身手,而且仲反串打籃球,簡直型到爆,但喺呢個洗衣液廣告,就冇乜機會展示高超球技。個故仔好簡單,係講佢同40個小朋友去球場踢波,搞到周身邋遢,之後齊齊去洗;而喺佢代言嗰隻洗衣液嘅協助之下,將所有衫洗得乾乾淨淨。雖則佢唔能夠喺廣告內表現佢型仔同埋性感嘅一面,不過勝在夠親民,完全入到屋,相信啲家庭主婦會好buy。
韋拿喺接受訪問時話,雖則佢喺廣告內要服侍班小朋友,幫佢哋洗衫,不過喺現實生活中,佢太太柏翠莎專責照顧佢兩個囡囡同埋負責做家務,若然佢有時間同埋太太唔介意佢搞亂檔,佢都會做嘅。此外,佢話雖則踢波會搞到周身污糟邋遢,不過可以啟發創意同有益身心,所以唔反對佢兩個囡囡踢波。

美斯代言意大利時裝

另外,美斯簽咗由D字同埋G字男性設計師主理嘅意大利高級時裝後,之後喺一啲宴會場合都會着呢個品牌嘅服飾,唔知佢會唔會型咗同靚仔咗呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載