› 選擇地區
三藩市
紐約
洛杉磯
其他美國地區
香港 台灣 北美
 
2010年12月02日

求驗客手記︰曼城要靠音樂打救 - 求驗客

曼城前鋒辛達告魯斯(右)為了慈善,與荷蘭歌手阿歷絲安祖合作出唱片籌款。
互聯網

話咁快2010年又就嚟完,12月最大節目當然係聖誕節。我求大俠記得細嗰讀中小學時,學校都會搞聖誕聯歡會,不外乎都係女同學整下菠蘿腸仔;集體活動又不外乎踩吓波、扑吓儍瓜咁上下,純過蒸餾水。大個仔參加聖誕派對,先知原來有咁多「其他嘢」玩。

泰仔邀隊友睇音樂劇

英超球星腰纏萬貫,過去參加聖誕派對,唔單止使費大,仲搞出好多醜聞;里奧費迪南、朗尼呢啲爛玩球星,當街「斷片」唔在講,仲傳過派對上涉及強姦案㖭!有見及此,好多領隊好似曼聯同曼城嘅費格遜同文仙尼,都禁止球隊今年再搞派對。不過聖誕普天同慶,球員又冇得休息同家人相聚,又有乜好做?曼城隊長泰維斯就有好介紹,就係睇音樂劇喇!
英國《太陽報》報道,泰維斯準備邀請隊友睇音樂劇《WeWillRockYou》,套劇主要講英國著名皇后樂隊,劇名就係佢哋嘅首本名曲之一《WeWillRockYou》;今次音樂劇由今年12月3日至下年1月15日獻映,喺曼徹斯特市皇宮劇場上演,門票唔係好貴,只係20至40鎊。泰維斯以前就睇過好多次,今個聖誕就決定同隊友分享。
唔好話我求大俠陰謀論,今次泰仔安排呢個節目可謂一石二鳥,一來可以睇音樂劇relax,二來仲可以做「交心」大會;事關原來費Sir都吩咐過加利仔,安排類似節目。畀面泰仔同文仙尼就出席,如果有離心嘅,好似成日嗌走嘅艾迪巴約,睇怕都係noshow。

辛達告魯斯出碟

泰利帶隊睇音樂劇,曼城另一前鋒辛達告魯斯,冇機會落場就出唱片打發時間;呢位巴拉圭國腳同荷蘭女歌手阿歷絲祖安(BeateAlexandra),合唱《LetYourLoveShine》為貧窮兒童籌款,大家可以上 https://roquesantacruz.sellaband.com/en/projects/theroquesantacruzfoundation ,聽吓佢嘅歌喉。
曼城咁多球員對音樂咁有興趣,就睇吓呢排亂亂哋嘅曼城,可唔可以藉音樂陶冶性情,挑戰「大佬」曼聯啦!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載