› 選擇地區
三藩市
紐約
洛杉磯
其他美國地區
香港 台灣 北美
 
2011年07月21日

求驗客手記:紅軍抄曼聯搵新小豆 - 求驗客

利物浦自杜利格殊重新上場後,用咗超過1億鎊(約12.6億港元)買球員,不過原來杜格利殊唔係淨係識使錢,亦識得去中美洲搵好嘢番嚟。佢見「小豆」查維亞靴南迪斯喺曼聯咁成功,於是亦有樣學樣,盛邀墨西哥超新星馬高般奴(MarcoBueno)嚟試腳,仲計劃同佢簽5年合約㖭!
杜格利殊喺今年1月再掌紅軍帥印後,頭尾使咗逾1億鎊簽蘇亞雷斯、安祖卡路爾、佐敦軒達臣、查理阿當同埋達寧,俾人洗腳唔抹腳嘅感覺。但係,佢亦偷同鄉、曼聯揸弗人費格遜條橋,見對方喺去夏簽入嘅「小豆」超成功,於是就照辦煮碗,睇中帕丘卡前鋒馬高般奴,象徵式邀請對方喺晏菲路腳10日,然後就開份5年合約畀佢。帕丘卡副會長法斯就話:「我哋家同利物浦傾緊。如無意外,馬高般奴會喺8月1日會自己畀錢飛去利物浦。利物浦想買佢嘅擁有權。」

謝太唔鍾意Harper8

現年17歲、比「小豆」後生6年嘅馬高般奴被認為係墨西哥新金童,喺6月舉行嘅世少盃,佢就打足7場比賽,帶領墨西哥喺自己國家揚威,並繼05年後再次捧盃。「小豆」去夏由瓜達拉哈拉加盟曼聯,頭一季打英超就入咗13球,隨即幫紅魔喺車路士手攞番聯賽錦標,唔知呢粒「小小豆」係咪一樣咁掂。
另外,天生一副外父相嘅利物浦隊長謝拉特,預計喺11月會又做老竇,由於碧咸用自己嘅球衣號碼嚟做個BB嘅名,將個BB叫夏芭七(HarperSeven),謝太居倫為免謝拉特有樣學樣,經已下令禁止個BB叫夏芭八(Harper8)。居倫就話:「如果佢諗住用佢波衫號碼嚟做個BB嘅名,我一定唔准囉!不過,我都喜歡夏芭呢個名。」
用球衣號碼嚟起名係有意義,但「唔怕生壞命,至怕改錯名」,我求大俠亦支持居倫嘅決定。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載