› 選擇地區
三藩市
紐約
洛杉磯
其他美國地區
香港 台灣 北美
 
2012年03月01日

求驗客手記:倫敦睇豪宅
摩連奴睇定嚟食 - 求驗客

摩連奴返英超?真係似層層喎。呢位皇家馬德里教頭最近就俾傳媒影到去倫敦睇樓,雖然唔表示啲乜,但係大家都相信,之後應該仲有下文,佢可能返車路士頂替隨時俾油王炒魷嘅波亞斯,甚至可能去教熱刺或者阿仙奴都唔定!

連睇幾個豪宅區

葡萄牙名帥摩佬趁國際賽檔期唔使帶隊比賽,喺禮拜一就靜雞雞去英國倫敦睇樓,點知逃唔出英國傳媒嘅法眼,俾狗仔隊影到晒。聽講佢去過豪宅區Knightsbridge同埋Mayfair睇過5個物業,暫時未知會喺邊區置業;亦都有傳佢會喺另一個豪宅區Belgravia搵樓。摩連奴突然現身倫敦,令人相信車仔班主阿巴莫域治,大有機會搵佢返嚟頂貨不對辦嘅波亞斯。
車仔上場喺英超3:0贏來訪嘅保頓,攞到近6仗首場勝仗,原本波仔可以鬆一口氣,點知佢又衰多口,先係話驚同阿巴關係突然轉差而被炒,仲狂插身價5,000萬鎊嘅費蘭度托利斯,將佢同前車仔兩大瘀血舒夫真高同基士文歸類埋一齊。呢兩單嘢令車仔班高層好唔高興,特別係阿巴,消息指佢決定唔再畀機會波仔,隨時郁手炒佢。

倫敦三雄任佢揀

摩佬喺07年同阿巴不歡而散,不過聽聞之後二人已重修舊好。家佢更加係「身在西甲、心在英超」,好回味喺車仔3年幾嘅日子;早前亦表示喺車仔仲有「未完成嘅工作」,暗示想幫對方贏歐聯。家陣佢喺皇馬教波,隊波喺西甲排榜首,亦好有機會入歐聯8強,表面好似好風光,但其實佢同高層、球員同球迷嘅關係都唔好,所以教得一啲都開心囉。
但係,睇中摩佬嘅唔單止得車仔,仲包括熱刺同阿仙奴。熱刺主帥哈利列納大有可能轉教英格蘭國家隊,阿仙奴則因為連續7季食白果而計劃換帥,所以佢哋都想打摩佬主意。另外,車仔諗住同33歲嘅杜奧巴續約,但魔獸竟然要求年薪喺除稅後有600萬鎊(約7,200萬港元),畢竟佢已過巔峯,似乎貪咗啲喎;至於冇份入選英軍嘅車仔中場林伯,前日就自己加操,抵讚!而佢隊友泰利就做完膝部手術,一個月內可復出,對車仔嚟講的確係好消息。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載