› 選擇地區
三藩市
紐約
洛杉磯
其他美國地區
香港 台灣 北美
 
2012年03月05日

求驗客手記:腦殘越蒲越有貨 吹脹! - 求驗客

巴洛迪利出名「腦殘」,除咗踢波,相信佢滿腦子仲有好多鬼馬嘢。
設計圖片

曼城「腦殘」巴洛迪利賽前走去睇脫衣舞,見晒報,仲好可能畀球隊重罰25萬鎊(約308萬港元),但偏偏佢喺場上又交到功課,仲吸引到大批粉絲支持,曼城領隊文仙尼都冇佢符,我求大俠亦對佢天使與魔鬼嘅性格又愛又恨!
文仙尼講過,唔想球員喺比賽前48小時出夜街,希望佢哋養足精神踢波;但腦殘點會咁聽話,喺上周六對保頓賽前36小時、即係上周五凌晨,佢同朋友去睇脫衣舞,仲畀記者影晒相,斷到正一正。

賽前睇脫衣舞罰308萬

文帥苦心婆心咁講:「如果件事係真,我會施以最重處分!我非常失望,星期日會同佢傾吓,無論對我、對球隊、抑或對佢自己,呢啲行為都唔應該做;喺比賽之前玩到成兩點幾,唔係專業球員嘅表現。我啱啱先聽到件事,所以我會睇吓係咪真先。唉!佢就係咁,踢波叻,但行為要檢點啲!」
據英國傳媒估計,文帥呢次好可能重罰腦殘兩周人工,大概25萬鎊。喺曼城對保頓場波,巴洛迪利如常打正選,仲入咗一粒,幫球隊主場輕取保頓2:0。文仙尼賽後苦笑:「如果佢早瞓幾個鐘,話唔定入到4、5球!」
腦殘行為反叛,我行我素,仲死性不改,搞到成日畀人鬧;但佢喺場上又交到貨,做到贏波功臣,難怪文帥只可以苦笑!但就係呢種天使與魔鬼嘅性格,令到好多年輕人產生共鳴,做咗佢粉絲。有曼城內部人士話:「佢真係好受歡迎,嚟自全球嘅傳媒都排住隊同佢做訪問,真係由年頭排到年尾。」

施華7.4億續約曼城4年

上星期,腦殘先同佢嘅忠實支持者、前Oasis成員加拉查(NoelGallagher)一齊幫BBC拍體育特輯。之後潮流月刊《FHM》又爭住搵巴洛迪利影封面,但曼城呢排比賽頻密,所以都要推,最後《FHM》搵咗英格蘭新隊長柏加頂上。
另外,曼城中場大衛施華表現好,球會將會同佢續約4年,據報份約總值6,000萬鎊(約7.4億港元)。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載