› 選擇地區
三藩市
紐約
洛杉磯
其他美國地區
香港 台灣 北美
 
2012年06月09日

歐國盃求驗客:百呎「鶴神」邪法國 - 求驗客

英格蘭喺今屆歐國盃未開波,衰嘢接二連三咁嚟,主力逐個唔踢得,最新一個輪到艾殊利高爾,無啦啦胃痛,雖然周五已復操,但唔知踢唔踢到聽晚英法大戰。諸事不順,有博彩公司決定幫吓手,為英軍喺對住法國個懸崖上面,整個近百呎高嘅鶴臣救世主像,實行靠「鶴神」邪一邪法蘭西。

英軍老西出巡萬人空巷

巴西里約熱內盧嘅基督像(ChristtheRedeemer)舉世知名,被選為世界新七大奇蹟之一。英格蘭家吓陣容殘成咁,要贏歐國盃真係要靠奇蹟。英國博彩公司PaddyPower有見及此,整咗個有成30米高(約100呎)嘅鶴臣救世主(RoytheRedeemer)喺英格蘭多佛海邊。「鶴神」攤開雙手遠眺大海遠處嘅法國,希望有神力可以幫到英格蘭喺歐國盃首戰,對住法國旗開得勝。博彩公司發言人羅拔仔話:「自從巴西喺1931年起咗基督像後,呢個國家就變咗做足球王國,希望我哋都整個像嚟幫吓英格蘭。」不過大家最好唔好由側面或者後面去睇,由於經費所限,呢個所謂「鶴神像」都係印出嚟,雖然兒戲咗啲,但勝在夠化算吖嘛。
已經身在波蘭克拉科夫嘅英軍,喺星期四完成閉門操練後,鶴臣同班國腳西裝筆挺咁去市內觀光,喺鬧市即刻畀大批市民同記者包圍。英軍仲去參觀當地藝術館,感受吓文化氣息。另外,英國政府嘅高官就決定唔親身去支持英格蘭,以抗議烏克蘭政府侵犯人權。

列貝利冷凍治療備戰

至於英格蘭首戰對手法國,備戰情況就悠然自得得多。法國兵駐紮喺頓涅茨克,星期四由於落大雨,所以大軍留喺集訓基地享受吓。列貝利試用冷凍治療機,據講可以透過液態氮加速身體復原;其他國腳有啲去做按摩,有啲就打吓機,輕鬆備戰英法大戰。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載