› 選擇地區
三藩市
紐約
洛杉磯
其他美國地區
香港 台灣 北美
 
2012年06月29日

現在直播室:飢腸轆轆 - 馬啟仁

長輩教落,一個人創業要成功,就千奇唔好比飽飯佢食,要佢好肚餓好肚餓,咁佢為咗生存咁基本嘅要求,自不然就會搏盡老命去搵生意,甚麼面子呀、尊嚴呀,都可以一一擺低,咁就好有機會可以做得出成績,直到佢有錢有面,唔肯再搏為止。
球隊有冇表現,除咗球員質素、戰術和狀態以外,成日都講鬥心,真係隨時就主宰咗比賽最後勝負。西、法大戰被喻為今屆最垃圾一戰,就係因為竟然遇着一隊波,佢哋夠膽死未打都預咗會輸,以為佢留力留力,留到最後一刻,點知原來冇力,冇計。
西班牙響嗰場好似施展催眠大法咁,但當時我哋都仲幫佢搵到好好嘅借口,就係法蘭西咁頹,唔通同你搏咩。之不過再經過西、葡一戰,噢,露底了,威足4年的西班牙終於富貴嘞,終於慢慢回塘收油嘞,球隊質素冇問題,係冇咗前鋒韋拿,但影響力好有限。球隊依然控球在腳,但以往係會無時無刻向前彈波子,家陣就會睇住賽果同睇住個鐘做人,啱啱好就夠嘞,唔使搏咁盡嘅,又唔係未威過。
就好似食自助餐咁,頭兩round就梗係同你攞到盡,之後呢,就睇心情嘞,咁其實呢個道理本來就天經地義,要怪亦怪唔到咁多。點樣可以解決呢?就係要慢慢畀一啲非常飢餓嘅新人接班,確保成隊波鬥心爆棚,咁先至可以接受到3個禮拜6場波嘅磨練。相比之下,另一支決賽分子肯定會肚餓過西班牙好多,從來冇球隊可以衞冕EURO,未必因為質素差咗,可能只係因為個胃太脹了。
文:Keyman
now節目主持

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載