› 選擇地區
三藩市
紐約
洛杉磯
其他美國地區
香港 台灣 北美
 
2012年07月13日

夏日求驗客
日本旋風吹抵曼巿 香川:盡快學英文 - 求驗客

香川(左)與另一曼聯新兵歷克包維(右),由費格遜帶領出席記招。
路透社

認真巴閉!曼聯日本第1人香川真司終於到達曼徹斯特報到。香川喺禮拜三飛抵曼市機場,隨即受到大班球迷熱烈歡迎,場面墟冚,搞到要勞煩警察護送佢離開。香川旋風席捲曼聯,連陣中老大哥里奧費迪南都即刻同佢示好,喺Twitter度話靠佢加深對日文嘅認識。香川初來甫到,里奧可以做佢嘅盲公竹,唔知遲啲里奧會唔會喺佢間Rosso餐廳度賣壽司呢?
香川真司絕對係曼聯今夏嘅重點收購,呢位轉會費達1,700萬鎊嘅日本國腳,喺禮拜二由大阪啟程去曼徹斯特,喺機場對前景充滿信心:「對我嚟講,呢次係重大挑戰,我由零開始但係對前途樂觀。首先我會喺操練度爭取表現,力爭喺正式比賽佔一席位。」
抵埗之後,香川見到唔少球迷同記者嚟歡迎,雖然坐咗成日飛機,但然表現得好開心。機場警察方面怕場面失控,決定護送佢離開。香川稍作休息後,喺禮拜四出席記招,再投入首課曼聯操練。領隊費格遜喺記招話:「我哋好可能會再簽多一兩個新球員。冇球員可以憑一己之力改變成隊波,但香川真司絕對係對戰局有舉足輕重嘅球員,可以令曼聯有更強進攻火力。」

下周征南非有望披甲

首度喺奧脫福亮相嘅香川,都好有信心喺英超可以殺出血路,佢亦明白嚟到英格蘭,最重要係先學好英文,等踢中場嘅佢,可以同隊友好好溝通:「語言非常重要,我希望盡快學好英文,等我可以好好同隊友溝通。」如無意外,香川會喺下星期遠征南非嘅熱身賽第一次披甲上陣。

里奧Twitter率先示好

香川抵英,隊友里奧費迪南就率先透過Twitter對佢表示歡迎:「我嘅第一堂日語課,我家先知佢應該係叫香川真司(西方人常將亞洲人姓同名調轉)。家所有曼聯嘅雜誌同節目,都會不斷咁出現呢個名字。」里奧為人好客,香川嚟到曼徹斯特人生路不熟,相信佢會帶新隊友周圍去行吓食吓,落吓bar同埋遊覽吓景點,當中自然唔少得去里奧開嗰間Rosso餐廳。

里奧喺佢間餐廳特別設立咗個「WallofFame」,掛咗好多到訪過嘅名人相,唔知遲啲會唔會掛埋香川張相上去呢?Rosso餐廳暫時只有西餐供應,我求大俠認為里奧不如叫香川過吓料,可以加新菜式賣壽司,話唔定有大把日本球迷嚟捧場㗎。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載