蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年08月17日
馬上成為壹會員

求驗客手記:假老馬捧場
美斯贏「德」風騷 - 求驗客

美斯一向畀人笑喺巴塞就無敵,返到阿根廷國家隊就冇晒力。不過呢個情況近期有變,球王喺近幾場國際賽頻頻有料到,周三又有波入,帶領阿根廷以3:1作客擊敗德國。美斯心情大好,就連有球迷闖入球場,要同佢握手都笑笑口配合。
雖然德國陣容不整,但今場波正選陣容仲有高路斯、湯馬士梅拿同奧斯爾等主力,加埋主場出擊,阿根廷要贏其實唔易。主隊喺開賽30分鐘打少個,門將薛拿禁區犯規領紅,不過美斯主射12碼宴客。德國以為大難不死,點知完半場前皇馬孖寶之一嘅基迪拉防守角球時擺烏龍,令德國完半場落後0:1。

阿根廷作客3:1挫德國

易邊後美斯終於發威,禁區頂接應希古恩回傳一射入網;到73分鐘,迪馬利亞遠射奠定勝局,德國只能夠喺完場前破蛋,算係挽回少少面子。
場波完場前仲有小插曲,有個揸住德國國旗嘅球迷衝入球場,走去同美斯握手,心情靚靚嘅美斯亦笑住咁成全佢,之後呢位球迷就好開心咁被保安帶走。同場仲加演假馬勒當拿觀戰,真身家身在中國,但呢位冒牌貨都扮得幾神似,聽講有啲外國記者俾佢呃到㖭。
美斯心情咁好,無他嘅,過去一年佢喺阿根廷國家隊嘅表現,真係非常醒神。自從教練沙比拿接任後,美斯喺10場國際賽入咗10球,其中9球仲要喺最近5場入嘅,終於唔使剩係着住巴塞波衫先識入波。
美斯賽後都係如常咁謙虛,話最開心見到阿根廷近期成績大有進步;至於沙比拿就喜見佢同阿古路喺鋒線配合出色。至於美斯嘅死敵基斯坦奴朗拿度都唔示弱,喺同日國際賽一樣有波入,幫葡萄牙喺主場以2:0擊敗巴拿馬。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載