› 選擇地區
三藩市
紐約
洛杉磯
其他美國地區
香港 台灣 北美
 
2012年08月28日

咖喱牛腩:奇勒好過波亞斯 - 牽牛

咖喱牛腩,有辣有唔辣。牽牛同咖喱將總結每周球賽,見到抵讚嘅事,牽牛定必重重有賞,用幾百字大讚吓佢;但見到抵鬧嘅人,咖喱就會毫不留情,省佢一餐。

《牛腩篇》上周六英超中輪,大家焦點或者係曼聯點樣辛苦嘅贏富咸,小弟反而集中睇熱刺對西布朗;呢場都幾多前車路士元素,兩隊領隊更加教過車仔㖭,戰果亦都反映,奇勒好過波亞斯一籌。

紅褲子奇勒排陣夠膽

你話小弟老套都好,我始終認為紅褲子出身嘅教練、領隊,較為有保證。雖然今時今日唔少例子,好似費Sir、雲格、摩連奴,教波叻過踢波,但始終球員生涯有一定份量,領軍都易好多。奇勒份人講真又係默默耕耘嗰種,踢車仔成11年,都只算得上實而不華,到做車路士、利物浦「老二」,畀人感覺都係助教料多啲。不過今季接替鶴臣坐正做西布朗領隊,反而畀人驚喜,首戰已贈利物浦3蛋,第2場作客熱刺,牌面又係輸晒。奇勒嘅排陣亦都幾夠膽,收起第一仗入「世界波」嘅謝拉,同奧丹維治,先同熱刺搶中場。到尾段落後一球後,換入車路士借將盧卡古,呢個「新杜奧巴」即時衝散成條熱刺防線,西布朗好運啲,其實唔單止追平,反勝全取3分都有機。同樣教過車仔,波亞斯呢位熱刺少帥又真係唔多掂,上季已經有傳聞,車仔球員特登輸波想搞到球會炒波亞斯,唔通熱刺球員家又有樣學樣?文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載