› 選擇地區
三藩市
紐約
洛杉磯
其他美國地區
香港 台灣 北美
 
2012年08月28日

車神寶、新星榮隔空勉勵

‧給大師兄黃金寶的信‧

若你真係退役,我就冇機會喺你身上學更多嘢,我轉全職得3個月,仲未學夠,希望你唔好引退。

「望你擱置退休計劃」

今次係我考完新中六試後,轉做全職車手3個月後去參加新西蘭世界場地青年賽,上星期六喺25公里記分賽,歷史性幫香港攞到呢面金牌,金牌附送嘅呢件世青賽彩虹戰衣,今次由我帶返香港;記得07年你都贏過彩虹戰衣,你嗰次成就都有激勵到我,所以好想透過呢封信同你表達心情,希望你可以擱置退休計劃。
真係好佩服你,踩咗咁多年單車,仲好堅持,依然日復一日咁去練,你已經係我哋隊中嘅大師級車手,但你仍然冇要求特別待遇,我哋踩幾多,你比我哋踩更多,又唔會有份優越感覺,我仲想喺你身上多多學習。
噚日返港,見到爸爸媽媽,哥哥妹妹都有到機場接機,好感動,希望下個月嘅荷蘭世青公路賽,可以喺超齡前,再攞多件彩虹戰衣。小師弟梁峻榮敬上

‧回師弟梁峻榮(肥仔)的信‧

今個月14號由倫敦返到香港後,噚日第一次出席公開活動,原本自己倫敦講過,好大機會要引退,但見到肥仔你咁好成績,自己都有啲動搖。

「你要腳踏實地」

其實以我家嘅身體狀況,要我踩多兩年都得,大約10月會決定自己去留,但以協助教練沈金康嘅工作機會大啲。肥仔你只得18歲,有咁嘅成績,我當然替你開心,但你要知道,青年組同成人組嘅比賽其實有一段好大嘅距離,希望你可以腳踏實地,一步步跳上去。
我噚日去浸大同學生分享,回想沈教練喺倫奧為師妹李慧詩盤算凱林賽嘅戰術時,搞到徹夜不眠。原來做教練要咁辛苦,諗起真係有啲驚。
分享會之餘,夜晚就出發去深圳,備戰下月西安環中國單車多日賽,未來兩個月,我仲有3個公路單車賽,我希望以輔助角色,同師弟們一齊參賽,如果自己狀態好,話唔定會贏到分站冠軍㖭。
至於沈金康嘅退休問題,我覺得佢仲係將單車擺喺第一位,香港單車嘅根基喺好,但要衝擊世界,仲要沈教練喺度帶住我哋。
黃金寶覆

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載