› 選擇地區
三藩市
紐約
洛杉磯
其他美國地區
香港 台灣 北美
 
2012年09月10日

咖喱牛腩:國足球品有進步 - 牽牛

國民教育搞到全城沸騰,唔多唔少都多得形容共產黨係「進步、無私及團結的執政團體」,呢啲假到冇朋友嘅課文範本。今時今日資訊發達,中國每年用幾千億維穩,但醜事傳千里,網絡一樣俾人翻到牆,國內衰嘢一樣傳遍國內外,要呃少數人已經唔易,仲要呃全港市民,共產黨真係太天真。近日,無意中睇到疑似國民教育有關足球篇嘅課題,講中國國家足球隊打入02年世界盃決賽周,雖然面對強隊輸晒,但課題似乎想引導學生,支持國足雖敗不辱;但係同樣醜事傳千里,國足今時今日無論喺中國人定香港人心目中,都係一班負資產。不過,上周四中國作客瑞典友賽,就多少令小弟改觀;以中國世界排名已經跌到78位,作客面對歐國盃、世界盃決賽周常客瑞典,輸一球已經算有交代。難得係國足球品好咗,瑞典前鋒伊巴謙莫域,向中國後衞趙鵬施展天殘腳,從照片上睇仲好似一腳踢中趙鵬塊面;畀着以前球霸時代嘅國足,唔係即時掩面博同情,就係回身同伊巴打過。不過趙鵬冇咁做,仲好大方咁講,伊巴已經收咗腳,自己冇受傷,大家唔好誤會;冇借啲意搞大件事,已經係有進步。講真,由甘馬曹接手後,國足係開始有啲進步,至少收起自大之心,知道世界天高地厚;周一作客5屆世界盃冠軍巴西,期望國足輸少當贏之餘,希望佢哋以虛心態度,向世界頂級球隊學嘢。牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載