› 選擇地區
三藩市
紐約
洛杉磯
其他美國地區
香港 台灣 北美
 
2012年10月02日

咖喱牛腩:紅魔少壯難發圍 - 咖喱

咖喱牛腩,有辣有唔辣。牽牛同咖喱將總結每周球賽,見到抵讚嘅事,牽牛定必重重有賞,用幾百字大讚吓佢;但見到抵鬧嘅人,咖喱就會毫不留情,省佢一餐。

咖喱篇

噚日針對曼聯輸畀熱刺場波做咗個簡單分析,就係費格遜排錯陣兼用錯人。今日都係講曼聯,但係總結開季呢幾場比賽,講吓費格遜唔識用拿尼同香川真司。雖然香川聯賽入咗兩球,但有睇波都知,香川嚟咗曼聯之後踢得好辛苦,成日要背住龍門攞波,又冇人同佢打短傳,費Sir好似當佢日本版韋碧克咁用。點先可以發揮到香川嘅真正威力?首先隊友要畀波佢用,但最重要係有人喺中間走位入楔,等佢可以餵波。不過,費Sir總係鍾意出一個人去減弱香川,嗰個就係史高斯。史高斯喺度,佢就係老大哥,冇人夠膽唔畀佢發辦,而史高斯鍾意玩長傳,對眼望住左右翼位多過望正前面,所以香川掂波機會就好少。另外,史高斯同卡域克都係鍾意住踢,好少上前,如果香川想搵人喺中路同佢踢吓撞牆,已經少咗兩個選擇,威力都冇咗半。反而香川同湯卡利華、路爾斯安達臣3個後生仔都鍾意短傳走位,3個一齊正選嘅化學作用肯定會大啲。拿尼喺曼聯表現起伏好大,好起上嚟可以做球隊救世主,衰起上嚟就俾人鏟到上天花板。拿尼強於突破,近幾場已經冇咁獨食,但佢始終弱於防守,同埋佢踢右邊好過左邊;其實曼聯可以參考吓葡萄牙個陣,拿尼做4-3-3入面嘅右翼,擁有極大嘅自由度,因為佢有3個體能出眾嘅中場支持,就可以減少回防,踢得會舒服啲。家費查復出埋,曼聯中場唔少體能好嘅球員,只係費Sir唔老唔用,先搞到班當打球員威力大減。文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載