› 選擇地區
三藩市
紐約
洛杉磯
其他美國地區
香港 台灣 北美
 
2012年10月16日

體壇拾趣
肉面飛龍 撲出名堂

羅馬尼亞丁組聯賽,有一個大大份嘅門將叫巴迪斯拉夫(Daniel Badislav)。唔好睇佢成286磅重,肚腩大到好似就生得咁,佢都幾靈活㗎。正所謂「一人有一個夢想」,呢位肥佬門將最希望效力羅甲豪門布加勒斯特迅速。

近300磅效羅國丁組隊

如果你係《足球小將》迷,你應該會記得,有一個叫中西太一嘅肥仔,一招以肚腩擋波嘅絕技,搞到戴志偉頭都大埋。雖然巴迪斯拉夫冇呢一門絕技傍身,但係靈活程度絕對同中西太一有得揮!呢位近300磅門將之所以成為傳媒焦點,都係多得佢效力嗰支羅丁球隊Ciorogaria,上場波有隊友同對手炒大鑊,仲鬧到上電視。片段中Ciorogaria輸咗個12碼,雖然肥佬門將捉錯路,但係佢一嘢飛到盡,身手真係唔錯。唔知布加勒斯特迅速球探見到,會唔會諗吓羅致佢呢?

港甲當年都有「肥福」

前港隊守門員、現東方教練鍾皓賢就話,90年代中期曾經與體重超過200磅嘅東方守門員希福特喺港聯合作,佢話:「雖然當年肥福年紀已唔輕,又有個肚腩,但位置感好,加上有足夠操練,對把關唔會有太大影響。」東方總監梁守志回憶,當年東方羅致希福特嗰陣,初嚟到埗曾俾佢嘅肥佬身形嚇親,但操練時見球員好難先可以射破佢十指關,就知道冇入錯貨。
同樣肥仔底嘅前港隊門將高志超指出,其實門將肥少少問題唔大,最緊要操得足,同身體協調好,腳步夠靈活就得:「打龍其實好講彈跳力同協調,只要夠力就可以彌補肥胖嘅缺點。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載