› 選擇地區
三藩市
紐約
洛杉磯
其他美國地區
香港 台灣 北美
 
2013年01月12日

馬圈818:So What?

冇咗韋達同潘頓,呢兩期賽事果然爆到唔清唔楚,主要原因應該係馬迷揀馬嗰陣冇咗方向感,今日佢兩個齊齊復出,對馬迷嚟講點都係利多過弊!
家陣潘頓以35W:33W,兩W壓住韋達,秤一秤佢哋嘅馬,潘頓騎九隻嚟自六個馬房,韋達騎少一場得八隻,但同樣由六個唔同嘅練馬單位供應,但比較特別係韋達嘅彈藥庫阿John蔡約翰,只得「奇兵」同「首飾孖寶」用韋達。諗真啲又好合理,事關阿John全日都只係出得四隻,同佢早輪有攻勢嗰陣次次出馬一大堆相差好遠,再講阿John已連續八日交白卷,擺明回緊氣。而每季二月打後先至係阿John真正攻勢嘅開始,呢個明顯係家陣拖低韋達成績嘅主因,所以近排朝早見韋達四圍搵練馬師攞馬跑,睇得出佢對保住冠軍寶座有晒決心,只要等到阿John嘅馬嚟料,事必以Fight低來勢洶洶嘅潘頓為快!
今次同潘頓合作嗰六個倉,最夾當然係葉楚航,近六匹合作馬四W兩Q準得交關,今日嘅「駿多贏」、「開心駕到」咪睇低。跟住就到方仔,近三匹合作馬全部W晒,今次隻「威威具星」贏完轉場爭盃,呢個寶尾唔怕追!仲有尾場阿Paul隻「新希望」,今季佢兩個合作13次,只得兩場冇獎金收,同樣咁準!
至於韋達又點?唔計阿John,告東尼算係最夾,季內合作十次有三W四P,其餘嘅蘇、文、葉廐通通只係贏一W咁大把!
睇番今日佢哋有七駒同場,一定會鬥得難分難解,事關近幾次賽事佢兩個埋身火併嘅鏡頭越嚟越多,經常鬥到一Q返,但唔知點解鬥親多數係潘頓贏,而潘頓每次鬥贏韋達都動作多多,從呢啲細微動作睇得出目前嘅潘頓幾有Heart,勢要打破韋達十三連冠嘅美夢!之但係都係嗰句,潘頓成與敗「還須看阿John」!

高明
Email:mailto:koming@appledaily.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載