› 選擇地區
三藩市
紐約
洛杉磯
其他美國地區
香港 台灣 北美
 
2013年02月02日

英倫心聲:
靠嚇冇用 「昆」唔到雀 - 蘋果波神

小弟本月起擂台輪空可輕裝上陣,喺本欄重點選材可以更放膽向冷門埋手,2月重新出發,希望隻「雀」諾域治爭氣,今晚頭場作客先啄昆士柏流浪。
虛張聲勢好易露底,默默耕耘,更值尊重!哈利列納不愧老狐狸,今個季中接掌遠遠包尾嘅昆士柏帥印;只見球隊用幾近全無戰術,由獨食精泰拉拔舞龍博亂同屯重中路防守嘅簡單足球,已能錄得1月聯賽全月不敗,難怪馬來西亞老闆心雄,任由列納掃貨。列納當然唔手軟,但竟向外宣稱,增兵一事主要由CEO菲臘伯特負責,佢老人家唔係太關心;呢位職場叻人,以往喺老樸提早跳船同教熱刺望英帥一職,證明唔可靠,不過「昆」老細,佢會有辦法。

先唔講長線發展;5天之內,昆軍中路防守重責由35歲嘅賴恩尼爾遜換上食英超回頭草、要10萬鎊周薪嘅剛果巨人基斯杜化森巴,真係嚇得吓人。不過球隊亦由上仗守和曼城嘅冷門,變成今場迎戰「金絲雀」諾域治嘅熱門一方;喺新兵不斷加入,合拍未熟下,成熱門主守變主攻便要小心。光榮退役赴美職聯教波嘅中堅尼爾遜,征戰英超多年自言弄得雙膝壞死,守到最後一刻,0:0和曼城光采離開,值得尊重;他的離去亦證昆軍全面變質,名牌人工高嘅過氣球星們委身窄小、只能容納不足1萬9千人嘅主場蓮花路,俗不可耐!
窄場利守,今場對手、平實諾域治今季戰績證明唔怕你嚇,唔怕打下風波;上仗僅末段被熱刺逼和,也有雄心護級;剛獲英冠列斯聯首席射手比治奧,同美職聯上季東岸1哥肯薩斯體育會嘅頭號前鋒基卡馬拉加盟,成效未知,但唔啱用壓力亦唔大。馬會今場初盤竟開出昆軍少讓平/半只得71水,有引人落叠博熱門之嫌,小弟決唱反調取冷門[+1],攻擊呢支水貨三線名牌隊。
更冷取作客韋根嘅修咸頓,後者換入新帥,戰力軍容如昔;上仗小負曼聯1:2見下半場開波即換走主力似留有以待,今場鬥同級陰陽怪氣嘅韋根演護級戰會見真章,冷W可敲。熱門,博阿仙奴大勝波膽,往績主場剋死史篤城,但難保不失波。
(下次見報日期:09/02)

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載