› 選擇地區
三藩市
紐約
洛杉磯
其他美國地區
香港 台灣 北美
 
2013年03月05日

求驗客手記:
賓特拿醉無恥 - 求驗客

唔講球迷可能唔醒起,自稱係超級球星嘅丹麥前鋒賓特拿仲係喺球壇存在緊。佢喺祖雲達斯因傷已經好耐冇踢過波,球場冇表現點見報?咪靠吓負面新聞囉。無所事事嘅賓特拿最近喺老家丹麥因為醉駕兼逆線行車被捕,佢之後仲喺Twitter度話只係好小事,對唔住囉!
賓特拿喺今季由阿仙奴外借到意甲祖雲達斯,雖然後者𠵱家喺榜首坐擁6分領先優勢,喺歐聯亦晉級8強在望,不過成績咁好全部都唔係好關賓特拿事。賓特拿加盟祖記之後上陣機會一直唔多,仲喺上年12月對卡利亞里場意盃比賽度受傷;當時預計要休養大約兩個月,計落應該係呢排可以復出,點知佢又爆出單醉酒駕駛出嚟。

丹麥醉駕逆線行車被捕

賓特拿趁仲未可以復出,喺上個周末返咗去丹麥哥本哈根,據當地傳媒報道,賓特拿喺上周六晚同個舊朋友去食壽司同埋落吧飲酒;之後到凌晨兩點揸住架車行錯線,俾警察截停,酒精呼氣測試「肥佬」被拘捕。好明顯賓特拿對今次事件唔當係一回事,警察放人之後佢喺自己Twitter度留言話:「親愛嘅朋友們,噚晚我因為醉酒駕駛呢啲小事俾人拉咗,過咗非常平靜嘅一晚。對於我所有朋友同球迷,我為今次單嘢致歉,飲完酒揸車係唔OK嘅,我會為事件負全責。」我求大俠點睇都唔覺得佢有悔意,睇怕呢單嘢都係罰款了事,賓生話要負全責自然講得咁口響喇。
賓特拿去到祖雲達斯,到𠵱家一球波都未入過;蛋都唔曉生隻仲成日搞事,睇怕祖記喺今季之後都係嗱嗱聲踢佢返去阿仙奴算數。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載